राज्यात आणखी एक परीक्षा रद्द, विद्यार्थ्यांचा संताप, आता या तारखेला पुन्हा होणार परीक्षा

शासनाच्या बार्टी (BARTI), आर्टी (ARTI), सारथी (SARTHI) आणि अमृत या संस्थांच्या वतीनं एमपीएससी करिता पूर्व तयारी परिक्षेकरीता मोफत मार्गदर्शन मिळावं, यासाठी ऑनलाईन प्रवेश परीक्षा आयोजित करण्यात आली होती. भंडारा जिल्ह्याच्या भंडारा आणि साकोली अशा दोन परीक्षा केंद्रावर ही परीक्षा आयोजित करण्यात आली होती. परंतु भंडारा येथील नूतन महाराष्ट्र विद्यालय येथील परीक्षा केंद्रावर परीक्षेदरम्यान मोठा गोंधळ उडाला.  या निमित्ताने पुन्हा एकदा प्रशासनाचा भोंगळ कारभार चव्हाट्यावर आला आहे. त्यामुळे विद्यार्थ्यांनी चांगलाच संताप व्यक्त केला. यावेळी परीक्षार्थ्यांमध्ये मोठा उद्रेक बघायला मिळाला.

या परीक्षेकरिता भंडारा जिल्ह्यासह लगतच्या गडचिरोली, चंद्रपूर, गोंदिया आणि अन्य जिल्ह्यातूनही शंभर पेक्षा अधिक परीक्षार्थी भंडाऱ्यात पोहोचले होते. दुपारी साडेचार वाजता सुरू झालेल्या परीक्षेदरम्यान भंडाऱ्यात मुसळधार पावसाला सुरुवात झाली. आणि त्यानंतर पावसामुळे परीक्षा केंद्रावरील वीज पुरवठा खंडीत झाला.  दरम्यान परीक्षा केंद्रावरील जनरेटरही बंद असल्यानं परीक्षा केंद्रावर परीक्षार्थींनी मोठा गोंधळ घातला. विद्यार्थ्यांचा गोंधळ बघता या प्रकाराची गंभीर दखल घेत जिल्हा प्रशासन आणि पोलीस प्रशासनाच्या मध्यस्थीनं तात्काळ बार्टीचे मुख्यालय पुणे येथे संपर्क साधून, आजची परीक्षा रद्द करून ती पुढे ढकलण्यात आली आहे. आता ही परीक्षा 24 सप्टेंबर रोजी होणार आहे.

विद्यार्थ्यांना मनस्ताप 

दरम्यान या परीक्षेसाठी विद्यार्थी दूरवरून भंडारा येथील नूतन महाराष्ट्र विद्यालय येथील परीक्षा केंद्रावर आले होते. परंतु परीक्षा सुरू असतानाच जोरदार पावसाला सुरुवात झाली. पावसामुळे लाईट देखील गेली. परीक्षा केंद्रावर लाईटची सुविधा नसल्यामुळे विद्यार्थ्यांचा चांगलाच संताप झाला, विद्यार्थ्यांनी परीक्षा केंद्रावर चांगलाच गोंधळ घातला. दुरूवरून मुलं या परीक्षेसाठी आली होती. या मुलांचा वेळ तर वाया गेलाच परंतु त्यांना मोठा आर्थिक फटका देखील बसला आहे. त्यामुळे विद्यार्थ्यांकडून नाराजी व्यक्त करण्यात येत आहे. दरम्यान त्यानंतर आता पुन्हा एकदा ही परीक्षा घेण्याचा निर्णय घेण्यात आला आहे. यामुळे काही काळ चांगलाच गोंधळ उडाला होता.