राँग साईडने आले अन् क्षणात घात…; मनसेच्या बड्या पदाधिकाऱ्याला भरधाव कारने उडवलं; प्रकृती चिंताजनक

गेल्या काही दिवसांपासून राज्यात अपघातांचे प्रमाण सातत्याने वाढ आहेत. त्यातच बदलापूर शहरात एक अत्यंत धक्कादायक आणि भीषण अपघाताची घटना समोर आली आहे. महाराष्ट्र नवनिर्माण सेनेचे मुरबाड विधानसभा अध्यक्ष राजेश शेटे यांना एका भरधाव कारने जोरदार धडक दिली आहे. हा अपघात ७ जून रोजी रात्री ११.३० च्या सुमारास बदलापूर पूर्व आणि पश्चिमेला जोडणाऱ्या स्वातंत्र्यवीर सावरकर उड्डाणपुलावर घडला. या भीषण अपघातात राजेश शेटे हे गंभीर जखमी झाले. सध्या त्यांच्यावर स्थानिक खाजगी रुग्णालयात उपचार सुरू आहेत.

नेमकं काय घडलं?

मिळालेल्या माहितीनुसार, मनसेचे पदाधिकारी राजेश शेटे हे ७ जून रोजी रात्री ११.३० च्या सुमारास आपल्या दुचाकीवरून बिलोली परिसरातून आदर्श स्कूलकडे जात होते. स्वातंत्र्यवीर सावरकर उड्डाणपुलावरून आदर्श नगरच्या दिशेने जात असताना, शेटे हे दुचाकीवरून राँग साईडने येत होते. याच दरम्यान समोरून येणाऱ्या एका भरधाव चारचाकी वाहनाने त्यांच्या दुचाकीला समोरून जोरदार धडक दिली.

ही धडक इतकी भीषण होती की राजेश शेटे दुचाकीवरुन खाली पडले आणि गंभीर जखमी झाले. या अपघातानंतर स्थानिक नागरिकांनी आणि प्रत्यक्षदर्शींनी तातडीने घटनास्थळाकडे धाव घेतली. तसेच राजेश शेटे यांना तातडीने उपचारासाठी जवळच्या रुग्णालयात दाखल केले. सध्या त्यांच्यावर अतिदक्षता विभागात वैद्यकीय उपचार सुरू आहेत. त्यांची प्रकृती चिंताजनक असल्याची माहिती वैद्यकीय सूत्रांकडून मिळत आहे.

अपघात CCTV कॅमेऱ्यात कैद; चालक फरार

हा संपूर्ण अपघात उड्डाणपुलावरील आणि परिसरातील सीसीटीव्ही (CCTV) कॅमेऱ्यात कैद झाला आहे. या अपघातानंतर जखमी झालेल्या शेटे यांना मदत करण्याऐवजी कार चालक कारसह घटनास्थळावरून वेगाने फरार झाला. पोलिसांनी घटनेचे गांभीर्य लक्षात घेऊन तातडीने घटनास्थळाचे सीसीटीव्ही फुटेज आपल्या ताब्यात घेतले आहे. फुटेजच्या आधारे संबंधित कारचा नंबर आणि चालकाची ओळख पटवण्याचे काम युद्धपातळीवर सुरू आहे.

मनसे कार्यकर्त्यांमध्ये संतापाचे वातावरण

या अपघाताची माहिती मिळताच मनसेचे स्थानिक पदाधिकारी, कार्यकर्ते आणि शेटे यांच्या समर्थकांनी मोठ्या संख्येने रुग्णालयात गर्दी केली होती. या घटनेमुळे बदलापूर आणि मुरबाड परिसरात मनसे कार्यकर्त्यांमध्ये तीव्र संतापाचे वातावरण निर्माण झाले आहे. अपघात घडवून पळ काढणाऱ्या त्या अज्ञात कार चालकाचा पोलिसांनी तातडीने शोध घ्यावा आणि त्याच्यावर कठोर कायदेशीर कारवाई करावी, अशी मागणी मनसे कार्यकर्त्यांकडून केली जात आहे. या प्रकरणी बदलापूर पोलीस ठाण्यात गुन्हा दाखल करण्यात आला आहे. तसेच आरोपी चालकाला लवकरच ताब्यात घेतले जाईल असा विश्वास पोलिसांनी व्यक्त केला आहे.