गुंगीचे औषध देऊन पतीवर जीवघेणा हल्ला, नंतर जिवंत गाडण्याचा प्रयत्न; बारामतीत खळबळ

गेल्या काही काळापासून गुन्हेगारीच्या प्रमाणात झपाट्याने वाढ झाली आहे. अशातच आता बारामती शहरातील एका धक्कादायक प्रकरणाने परिसरात मोठी खळबळ उडाली आहे. पतीला गुंगीचे औषध देऊन अर्धबेशुद्ध केल्यानंतर त्याच्यावर बॅटने हल्ला करून घरातच बांधलेल्या चौकोनी कट्ट्यात पुरण्याचा कथित प्रयत्न झाला आहे. याबाबतची तक्रार बारामती शहर पोलिसांकडे दाखल झाली आहे. या प्रकरणी पत्नीविरुद्ध खुनाच्या प्रयत्नाचा गुन्हा नोंदविण्यात आला असून पोलिसांकडून पुढील तपास सुरू आहे. याबाबत सविस्तर माहिती जाणून घेऊयात.

पत्नीच्या कृत्याने बारामतीत खळबळ

बारामतीतील या घटनेप्रकरणी प्रकाश कान्होबा जगताप (वय 71, रा. ढाकाळे, ता. बारामती) यांनी बारामती शहर पोलिस ठाण्यात फिर्याद दिली आहे. फिर्यादीनुसार त्यांची सून शर्मिला प्रविण जगताप (वय 38, रा. इंद्रप्रस्थ सोसायटी, जामदार रोड, बारामती) हिच्याविरुद्ध भारतीय न्याय संहिता (बीएनएस) कलम 109(1) अन्वये गुन्हा दाखल करण्यात आला आहे. आता पुढील तपास पोलिसांनी सुरू केला आहे.

पतीला जखमी करून पुरण्याचा प्रयत्न

फिर्यादीनुसार, 30 जुलैच्या रात्रीपासून 1 ऑगस्टच्या सकाळीदरम्यान हा प्रकार घडला. आरोपी महिलेने तिचे पती प्रविण प्रकाश जगताप (वय 41) यांना गुंगीचे औषध देऊन अर्धबेशुद्ध केले. त्यानंतर बॅटने मारहाण करून त्यांचा जीव घेण्याचा प्रयत्न केल्याचा आरोप तक्रारीत करण्यात आला आहे. तक्रारीनुसार, हल्ल्यानंतर जखमी व बेशुद्ध अवस्थेतील प्रविण जगताप यांना घरातील हॉललगतच्या गॅलरीत बांधलेल्या चौकोनी कट्ट्यात ठेवून त्यावर फरशी बसवून पुरण्याचा प्रयत्न करण्यात आला. मात्र, हा कथित कट उघडकीस आल्यानंतर प्रकरण पोलिसांपर्यंत पोहोचले.

पोलिसांकडून सखोल तपासाला सुरूवात

तक्रारीच्या आधारे बारामती शहर पोलिसांनी गुन्हा नोंदविला असून या प्रकरणाचा तपास सहायक पोलीस निरीक्षक शशिकांत इंगवले करत आहेत. जखमी प्रविण जगताप यांच्यावर रुग्णालयात उपचार सुरू असून घटनेमागील नेमके कारण, पुरावे आणि सर्व परिस्थितीचा तपास पोलिसांकडून केला जात आहे. दरम्यान, या प्रकरणातील आरोपांची सत्यता तपासाअंतीच स्पष्ट होणार असून, शहरात या घटनेची मोठी चर्चा सुरू आहे.