…तरी तुम्ही मला मतदान का करणार नाही?; पंकजा मुंडेंचा मतदारांना थेट सवाल

महायुतीच्या उमेदवार पंकजा मुंडे यांच्या प्रचारासाठी बीडच्या परळीत सभा झाली. यावेळी पंकजा मुंडे यांनी उपस्थितांना काही सवाल केले. एक पंकजा मुंडे महाराष्ट्रात दहा ठिकाणी सभा घेऊन आली. माझ्या एका सभेने जर इतर ठिकाणचे खासदार निवडून येत असतील तर तुम्ही मला मतदान का करणार नाही? मी विकास केला की नाही मी विकास करताना जातिवाद केला का? मी कधी जात-पात पाहिली का? माझ्यासमोर येणाऱ्या व्यक्तीला आम्ही कधी जात विचारले का?, असं पंकजा मुंडे म्हणाल्या.

जातीपातीचे विष पेरण्याचं काम काही शक्ती करत आहेत. परंतु त्याला बळी पडू नका. या भागाच्या विकासासाठी मी ही निवडणूक लढवत आहे. प्रभु वैद्यनाथाची ही सावली दूर करू नका. प्रत्येक बूथ मजबूत करा. मी मजबूत विकास दिल्याशिवाय राहणार नाही, असं आश्वासन पंकजा मुंडेंनी दिलं.

पंकजा मुंडे काय म्हणाल्या?

लोकांना भूलथापा मारण्याचा प्रयत्न सुरू आहे. मुस्लिम बांधवांना भीती घालण्याचा प्रयत्न केला जात आहे. मात्र कोणत्याही मुस्लिम बांधवांनी घाबरायची गरज नाही. तुमच्या केसालाही धक्का लागू देणार नाही. आम्ही बहिण-भाऊ मिळून सर्व जाती धर्मांना सर्व समाजांना सोबत घेऊन दोघं एकत्र मिळून वाटचाल करू. आपल्या भागाचा विकास करू राष्ट्रवादी काँग्रेसच्या कार्यकर्त्यांचेही आभार मानते. 13 तारखेला मला मतदान करा. अशी विनंती, असंही पंकजा मुंडे या सभेत म्हणाल्या.

पंकजा मुंडेंचं भावनिक आवाहन

चार जुनला आपला निकाल आहे. मी याच हातांनी चार जूनला मुंडे साहेबांचा अंत्यविधी केलेला आहे. आपण खरंतर त्या वेळेला मुंडे साहेबांचा सत्कार करणार होतो. अख्खी परळी त्यासाठी सजली होती. तो सत्कार झालाच नाही. त्या सोहळ्याचे स्वप्न अपूर्णच राहिलं तमाम परळीकरांचे प्रेम नियतीने हिरावून घेतलं. आता पुन्हा चार जून हीच तारीख काळाने आपल्यासमोर आणली आहे. हे अधुरं स्वप्न पूर्ण करण्यासाठीची ही संधी आहे, असं भावनिक आवाहन पंकजा मुंडे यांनी यावेळी मतदारांना केलं.