थर्डी फर्स्टला पहाटे 5 वाजेपर्यंत जल्लोष! मद्यविक्रीच्या वेळेत सूट, सरकारचा मोठा निर्णय; तपासून घ्या वेळ
नाताळ आणि नवीन वर्षाच्या स्वागतानिमित्त मद्यविक्री आणि बिअर बार उशिरापर्यंत सुरू ठेवण्यास सवलत देण्यात आली आहे. महाराष्ट्र सरकारने मोठा निर्णय घेतला आहे. त्यामुळे या वेळा काय आहेत, ते तपासून घ्या..
देशभरात नाताळ आणि नवीन वर्षाच्या स्वागताची उत्सुकता पहायला मिळतेय. अशातच तळीरामांसाठी खुशखबर आहे. कारण नाताळ आणि 31 डिसेंबरनिमित्त मद्यविक्री आणि बिअर बार उशिरापर्यंत सुरू ठेवण्यास सवलत देण्यात आली आहे. मद्यविक्रीची दुकानं रात्री 1 वाजेपर्यंत सुरू ठेवण्यास सवलत आहे. तर पोलीस आयुक्तालये असणाऱ्या हद्दीत बिअर बार आणि इतर आस्थापनांना पहाटे 5 पर्यंत दुकानं सुरू ठेवण्यास मंजुरी आहे. नाताळ आणि नववर्षानिमित्त 24 डिसेंबर, 25 डिसेंबर आणि 31 डिसेंबर रोजी राज्यातील विविध मद्य विक्रीची दुकानं आणि बिअर बार निर्धारित वेळेनंतर रात्री उशिरापर्यंत चालू ठेवण्यास शासनाने मंजुरी दिली आहे.
अनुज्ञप्तीच्या प्रकारानुसार मद्यविक्री करण्यास किती वाजेपर्यंत सूट?
- एफएल- 2 (विदेशी मद्य किरकोळ विक्रीचं दुकान) रात्री 10.30 ते दुसऱ्या दिवशी पहाटे 1 वाजेपर्यंत सुरू ठेवण्याची परवानगी
- उच्च दर्जाची आणि अतिउच्च दर्जाची श्रेणीवाढ मिळालेली एफएल- 2 ला रात्री 11.30 ते दुसऱ्या दिवशी पहाटे 1 वाजेपर्यंत परवानगी
- एफएलडब्ल्यू 2 आणि एफएलबीआर 2 ला रात्री 10.30 ते दुसऱ्या दिवशी पहाटे 1 वाजेपर्यंत मंजुरी
- एफएल 3 (परवाना कक्ष) आणि एफएल 4 (क्लब अनुज्ञप्ती) यांना पोलीस आयुक्तालयाच्या परिक्षेत्रासाठी रात्री 1.30 ते पहाटे 5 वाजेपर्यंत आणि पोलीस आयुक्तालयच्या परिक्षेत्राच्या व्यतिरिक्त रात्री 11.30 ते दुसऱ्या दिवशी पहाटे 5 वाजेपर्यंत मंजुरी आहे.
- नमुना ई (बीअर बार) आणि ई-2 यांना मध्यरात्री 12 ते दुसऱ्या दिवशी पहाटे 5 वाजेपर्यंत परवानगी
- सीएल 3 ला महानगरपालिका तसंच ‘अ’ आणि ‘ब’ वर्ग नगरपालिका क्षेत्रातील अनुज्ञप्तींसाठी रात्री 11 ते दुसऱ्या दिवशी पहाटे 1 वाजेपर्यंत आणि इतर ठिकाणी रात्री 10 ते दुसऱ्या दिवशी पहाटे 1 वाजेपर्यंत मंजुरी आहे.
वेळेत शिथिलतेची मंजुरी असली तरी सार्वजनिक शांतात, कायदा आणि सुव्यवस्था यांचा विचार करून जिल्हाधिकारी आवश्यकतेनुसार वेळेची शिथिलता कमी करू शकतील. नवीन वर्षाच्या स्वागताच्या वेळी पोलिसांचा जागोजागी चोख बंदोबस्त असणार आहे. ड्रंक अँड ड्राइव्हसारख्या घटना घडू नयेत यासाठी वाहतूक पोलीस सजग असतील. नियमांचं काटेकोरपणे पालन करण्याचे निर्देश पोलिसांकडून देण्यात आले आहेत. त्याचप्रमाणे अवैध दारू विक्रीवर चाप बसवण्यासाठी राज्य उत्पादन शुल्क विभागाची पथकं तैनात होतील.
