Bhandara Accident : नातेवाईकांसोबत गप्पा मारत चालले होते पती-पत्नी, इतक्यात भरधाव ट्रकने धडक दिली अन्…

भंडारा / 28 ऑगस्ट 2023 : भरधाव ट्रकने दुचाकीला दिलेल्या धडकेत पती-पत्नीचा जागीच मृत्यू झाल्याची घटना भंडारा येथे घडली. या अपघातात एक महिला गंभीर जखमी झाली आहे. तुमसर-मोहाडी राज्य मार्गावरील खरबी येथे ही घटना घडली. बालचंद ठोंबरे आणि वनिता ठोंबरे असे ट्रकच्या धडकेत ठार झालेल्या पती पत्नीचे नाव आहे. तर नलू दामोदर बडवाईक असे जखमी असलेल्या महिलेचे नाव आहे. अपघाताची माहिती कळताच मोहाडी-तुमसर पोलीस घटनास्थळी दाखल झाले. पती-पत्नीचे मृतदेह शवविच्छेदनासाठी मोहाडी ग्रामीण रुग्णालयात दाखल करण्यात आले आहे. मोहाडी पोलिसात अपघाताची नोंद करण्यात आली असून, पोलिसांनी ट्रक चालकाला अटक केली आहे. घटनेची माहिती मिळताच घटनास्थळी आमदार राजू कारेमोरे, माजी आमदार चरण वाघमारे यांनी भेट दिली.

रस्त्याच्या शेजारी नातेवाईक महिलेसोबत बोलत होते

भंडारा-तुमसर राज्यमार्गावरुन भंडाराहून तिरोडा अदानी कंपनीमध्ये कोळसा घेऊन ट्रक जात होता. यावेळी खरबी येथे महामार्गाच्या बाजूला दुचाकी उभी करुन पती-पत्नी आपल्या नातेवाईक महिलेसोबत बोलत होते. यावेळी विरुद्ध दिशेने येणाऱ्या भरधाव ट्रकने दुचाकीला समोरुन जोरदार धडक दिली. या धडकेत दुचाकीवरील पती-पत्नी जागीच ठार झाले. तर एक महिला गंभीर जखमी झाली. मयत दुचाकी चालक बालचंद ठोंबरे हे रेल्वेमध्ये कार्यरत होते.

अपघात घडताच ट्रक चालकाने घटनास्थळावरून पोबारा करीत मोहाडी पोलीस ठाणे गाठले. सदर घटनेची माहिती होताच घटनास्थळी नागरिकांची मोठ्या प्रमाणात गर्दी उसळली होती. घटनास्थळावरील वातावरण चिघळत असल्याचे लक्षात घेत गर्दीवर नियंत्रण ठेवण्यासाठी तुमसर-मोहाडी येथील पोलीस दाखल झाले. तसेच भंडारा येथील राज्य राखीव दलाचा चमू सुध्दा दाखल झाला होता. सदर घटनेचा पुढील तपास मोहाडी पोलीस करीत आहेत.