सॉफ्टवेअर इंजिनिअरचीही फसवणूक, सायबर भामट्यांनी अभियंत्यासह आठ जणांना कसे फसवले

पुणे | 27 ऑगस्ट 2023 : राज्यात ऑनलाइन फसवणुकीचे अनेक प्रकार घडत आहेत. गेल्या काही दिवसांपासून सायबर फसवणुकीच्या घटना वाढत आहेत. ऑनलाईन फसवणुकीत सर्वसामान्य व्यक्तीप्रमाणे उच्च शिक्षित लोकही अडकत आहेत. पुण्यात सायबर चोरट्यांनी चक्क महिला आयटी अभियंत्यासह आठ जणांची फसवणूक केली आहे. चांगल्या परताव्याचे लालच आणि टास्क देऊन ही फसवणूक झाली आहे. या प्रकरणी गुन्हा दाखल झाला आहे. सायबर फसवणुकीचे प्रकार वाढत असताना गुन्ह्यांचा तपास लागण्याचे प्रमाण नगण्य आहे. यामुळे खबरदारी बाळगणे गरजेचे आहे.

काय घडला प्रकार

पुणे शहरातील ३६ वर्षीय महिला सॉफ्टवेअर इंजिनिअरबाबत हा प्रकार घडला आहे. सॉफ्टवेअर इंजिनिअरसह एकूण आठ जणांची 25.65 लाखांत फसवणूक झाली आहे. या प्रकरणी पुण्यातील चंदननगर पोलिसांत गुन्हा दाखल झाला आहे. पोलिसांनी दिलेल्या माहितीनुसार, जानेवारी ते एप्रिल महिन्यात ही घटना घडली आहे. पोलीस निरीक्षक राजेंद्र लांडगे यांनी सांगितले की, फिर्यादीला ऑनलाइन इन्कमसंदर्भात मोबाईलवर मेसेज आला. या कामाच्या बदल्यात चांगले उत्पन्न मिळणार असल्याचे फिर्यादीला सांगण्यात आले. मग सुरुवातील कामाच्या बदल्यात काही रक्कम दिली.

अशी झाली फसवणूक

फिर्यादीचा विश्वास संपादन केल्यानंतर अजून चांगले उत्पन्न हवे असल्यास गुंतवणूक करण्याचे सांगितले. महिला अभियंत्याने त्यांच्यावर विश्वास ठेवत 5.22 लाख रुपये दिलेल्या बँक खात्यात वर्ग केले. त्यानंतर अजून पैशांची मागणी होऊ लागली. आपण फसवले गेल्याचे त्यांना लक्षात आल्यावर पोलिसांत गुन्हा दाखल करण्यात आला आहे. सायबर भामट्यांनी असाच प्रकार इतर काही जणांसोबत केला आहे.

सायबर गुन्हे वाढले, सावध व्हा

राज्यात सायबर फसवणुकीचे प्रकार वाढले आहे. सायबर भामटे विविध प्रकारे लोकांना फसवत आहेत. यामुळे कोणालाही आपल्या बँकेचे डिटेल्स शेअर करु नका. घरबसल्या ऑनलाईन कामे देणाऱ्या या टोळ्यापासून सावध राहण्याचे आवाहन पोलिसांनी केले आहे.