खात्यात फक्त २३९ रुपये, सायबर भामट्यांनी फसवणूक केली २ लाखांची

पुणे | 7 ऑगस्ट 2023 : राज्यात ऑनलाइन फसवणुकीचे अनेक प्रकार घडत आहेत. गेल्या काही दिवसांपासून सायबर फसवणुकीच्या घटना मोठ्या प्रमाणावर वाढल्या आहेत. ऑनलाईन फसवणूक करणारे सायबर चोरटे नवीन नवीन शक्कल लढवून फसवणूक करत आहेत. सायबर चोरट्यांच्या या जाळ्यात उच्च शिक्षित नागरिकही अडकत आहे. पुणे सायबर सेलकडे फसवणुकीच्या अनेक तक्रारी येत आहे. आता तर खात्यात २३९ रुपये असताना आयटी कंपनीत काम करणाऱ्या महिलेची दोन लाखांत फसवणूक झाली आहे.

काय आहे प्रकार

पुणे शहरातील २६ वर्षीय महिला एका आयटी कंपनीत काम करते. ती टेली सॉफ्टवेअरवर काम करत असताना सॉफ्टवेअर व्यवस्थित चालत नसल्यामुळे तिने गुगलवरुन टेली सॉफ्टवेअर कंपनीचा क्रमांक शोधला. त्यावर फोन करुन अडचण सांगितली. समोरच्या व्यक्तीने त्यासाठी दहा रुपये शुल्क लागणार असल्याचे सांगितले. त्यावेळी तिच्या मोबाईलवर आलेला ओटीपी तिने त्या व्यक्तीला दिला. त्यानंतर तिच्या खात्यातून पाच हजार रुपये डेबिट झाल्याचा फोन आला. त्यामुळे तिने त्या खात्यातील सर्व रक्कम दुसऱ्या खात्यात टाकली. तसेच एटीएम कार्ड ब्लॉक केले. त्यानंतर तिच्या खात्यात २३९ रुपये राहिले होते.

त्यानंतर रक्कम गेली

महिलेच्या खात्यातील दुसऱ्या अकाउंटमधूनही पुन्हा रक्कम गेली आहे. तिच्या खात्यातून २५ हजार, ५० हजार डेबिट झाल्याचा मेसेज आला. तिच्या खात्यात तीन लाख पाच हजार रुपये होते. परंतु शिल्लक रक्कम १ लाख १५ हजार राहिली. तिच्या खात्यातून एकूण सात वेळा १ लाख १० हजार ११ रुपये काढण्यात आले. या प्रकरणी महिलेने दिलेल्या फिर्यादीवरुन गुन्हा दाखल झाला आहे.

ओटीपी देऊ नका

गुगलवर सायबर भामट्यांनी अनेक बनावट क्रमांक टाकलेले असतात. यामुळे कंपनीच्या वेबसाईटवर जाऊनच कॉल सेंटरवरील क्रमांक घ्यावा. तसेच कोणालाही आपला ओटीपी देऊ नये, असे आवाहन सायबर पोलिसांनी केले आहे.