एकीकडे पाऊस दुसरीकडे चिखल; असा साजरा केला जातो चिखल महोत्सव

भंडारा : तंत्रज्ञानाच्या युगात विद्यार्थी मोबाईल, लॅपटॉपच्या दुनियेत रमतात. प्रत्यक्ष मैदानात येऊन खेळण्याचा संबंध खूपच कमी झाला आहे. विविध खेळ मोबाईलमध्ये आल्यानं मुलं मोबाईल हातातून सोडत नाहीत. यामुळं विद्यार्थ्यांचा शारीरिक विकास होत नाही. चिखलात हात घालायचं म्हटलं किंवा अंगाला चिखल लागलं तरी अलीकडे नको नको वाटतं. मात्र, पावसाळ्यातील खेळ मागे पडत चालले आहेत. हाच धागा पकडत भंडाऱ्यातील ठाणा पेट्रोलपंप येथील आदर्श कनिष्ठ महाविद्यालयानं चिखल महोत्सव घेतला. वेगळेपण दाखविणाऱ्या या चिखल महोत्सवाची आता चर्चा होऊ लागली आहे.

डोक्यापासून पायापर्यंत सर्वजण चिखलानं माखलेले दिसले. विद्यार्थी एकमेकांना न ओळखताही खेळात दंग झाले होते. शिवाय शरीराचा व्यायामदेखील झाला. अभ्यासाच्या दुनियेतील एका वेगळ्या दुनियेचा मनमुराद आनंद प्रत्येक विद्यार्थ्यांनी लुटला. असा प्रयोग प्रत्येक शाळा महाविद्यालयांमध्ये राबवावा, अशी भावना यावेळी विद्यार्थ्यांनी व्यक्त केली.

धान रोवणीसाठी चिखलणी केली जाते

धानपट्ट्यात रोवणी करण्यापूर्वी शेतीची मशागत केली जाते. जमीन नांगरली जाते. त्यानंतर पट्टा मारून तण त्याखाली गाडला जातो. ही माती अतिशय मऊ असते. या मातीत धानाचे रोप लावले जाते. यालाच रोवणा असे म्हणतात. रोवणा रोवत असताना माती अतिशय सुंदर असते. या मातीत महिला धानाचे रोप लावतात.

विद्यार्थी जुळले मातीशी

इंटरनॅशनल शाळांमध्ये मड बॉथ ही संकल्पना राबवली जाते. ही संकल्पना खर तर या चिखल महोत्सवातून शाळा संचालकांनी विद्यार्थ्यांसमोर आणली. दहावी, बारावीचे विद्यार्थी चिखल महोत्सवात सहभागी झाले होते. पायाला माती लागली पाहिजे. यातून शरीराला ऊर्जा प्रदान होत असते. हे या चिखल महोत्सवामागचे शास्त्रीय कारण आहे. रोवणी संपली की, चिखलातून धावण्याची स्पर्धा आधी घेतली जायची. आता अशा महोत्सवाच्या माध्यमातून विद्यार्थी पुन्हा मातीशी जोडले जात आहेत.

नैसर्गिक मातीने केले रोमांचित

आम्ही असं खेळलो नव्हतो. चिखळात खेळल्याने खूप आनंद झाला. नैसर्गिक माती शरीराला रोमांचित करून गेली, असं विद्यार्थिनी म्हणाली. बारावीतील तेजस हटवार म्हणाला, आमच्याकडे शेती आहे. पण, शेतीत असं एन्जाय करू शकतो, असा कधी विचार आला नाही. आमच्या संचालकांनी आपण चिखलातही मजा करू शकतो, हे लक्षात आणून दिलं. त्याबद्दल त्यांचे धन्यवाद.