एकनाथ शिंदे – अमित शाहांची भेट… विधान परिषदेच्या जागा वाटपावरून ठिणगी… दिल्लीत मोठी खलबत, राज्यात लवकरच बड्या घडामोडी?

Eknath Shinde-Amit Shah Meeting: स्थानिक स्वराज्य संस्थांच्या विधान परिषद निवडणुकीतील जागा वाटपावरून जळगावमध्ये पहिली वादाची ठिणगी पडली आहे. शिवसेनेने स्वबळाचा नारा दिला आहे. ठाण्यासह छत्रपती संभाजीनगर आणि इतर ठिकाणीही शिवसेनेने आग्रही भूमिका मांडली आहे. उपमुख्यमंत्री एकनाथ शिंदे यांनी दोन दिवसांपूर्वी अचानक दिल्ली गाठली. त्यांनी केंद्रीय गृहमंत्री अमित शाह यांची भेट घेतली, अशी माहिती सूत्रांनी दिली आहे. यावेळी माजी शिक्षणमंत्री त्यांच्यासोबत असल्याचेही समजते.

राज्यात मोठा भूकंप?

स्थानिक स्वराज्य संस्थांच्या विधान परिषद निवडणुकीतील जागा वाटपावरून भाजप आणि शिवसेनेतील वाद जळगाव येथील जागेवरून उफाळून आले आहेत. शिवसेनेने एकला चलो रेचा नारा दिला आहे. तर छत्रपती संभाजनगर येथे शिंदे सैनिक जागेसाठी आग्रही आहेत. एकूण 17 जागेतील 7 जागांवर शिंदे सेनेचा दावा असल्याची माहिती सूत्रांनी दिली आहे. तर भाजपचा 12 जांगावर दावा आहे. त्यामुळे उर्वरीत 5 जागांमध्ये राष्ट्रवादी आणि शिंदे सेनेच्या हाती काही लागणार नाही. त्यावरून नाराजी नाट्य सुरू असल्याचे समजते.

एकनाथ शिंदे -अमित शाह यांची भेट

उपमुख्यमंत्री एकनाथ शिंदे यांनी अचानक दिल्ली गाठली. या दौऱ्यादरम्यान त्यांनी केंद्रीय गृहमंत्री अमित शाह यांची रविवारी भेट घेतल्याची माहिती सूत्रांनी दिली. या भेटीदरम्यान शिंदेंसोबत माजी शिक्षणमंत्री उपस्थित होते. ही भेट अत्यंत गोपनीय झाली. यावेळी त्यांचे स्वीय सहाय्यक अथवा शिंदे गटातील आमदार अथवा खासदार नव्हते, अशी माहिती सूत्रांनी दिली आहे. राज्यातील घाडमोडींवर यादरम्यान चर्चा झाल्याचे समजते. विधान परिषद निवडणुकीसंदर्भात चर्चा झाली. तर ठाकरे गटातील काही खासदार हे शिंदे यांच्या संपर्कात आहेत, त्यांच्याविषयीचा निर्णय कधीपर्यंत घ्यायचा याविषयी सुद्धा चर्चा झाल्याची माहिती समोर येत आहे. राज्यातील राजकीय हालचालींवरही चर्चा झाल्याचे समजते.

चार दिवसांपूर्वी दोन्ही नेत्यांमध्ये भेट ठरली होती. पण ही भेट काही कारणास्तव होऊ शकली नाही. त्यानंतर रविवारी अमित शाह आणि एकनाथ शिंदे यांची भेट झाली. या भेटीत राज्यातील घडामोडी आणि ऑपरेशन टायगर याविषयी चर्चा झाल्याचे समजते. आता राज्यात या भेटीचे काय परिणाम दिसतात याकडे सर्वांचे लक्ष लागले आहे.