शनी अमावस्या… नारंगी रुमाल, बैलगाडी आणि भोंदू बाबाचा खूनी खेळ… धुळ्यातील घटनेने संपूर्ण देश हादरला

धुळे जिल्ह्यातील साक्री तालुक्यात दुहेरी हत्याकांडाची घटना घडली असून या घटनेने जिल्हा हादरला आहे. एका भोंदूगिरी करणाऱ्या बाबाने एका विवाहित महिलेसह तरुणाचा खून केल्याचं पोलीस तपासात निष्पन्न झालं आहे. या प्रकरणी निजामपूर पोलिसांनी भोंदू योगेश खैरनार याला अटक केली असून त्याच्या विरोधात निजामपूर पोलीस ठाण्यात गुन्हा दाखल करण्यात आला आहे. शनी अमावस्येच्या रात्रीच त्याने हा खूनी खेळ खेळल्याची माहिती उघड झाल्याने संपूर्ण देशात खळबळ उडाली आहे. भोंदू खरातच्या लैंगिक प्रकरणानंतर आता भोंदू खैरनारने केलेल्या हत्याकांडाने खळबळ उडाली आहे.

धुळे जिल्ह्यातील साक्री तालुक्यातील वर्धाने शिवारात एका विवाहित महिलेचा मृतदेह आढळून आल्याने एकच खळबळ उडाली होती. एका फायनान्स कंपनीत डेली कलेक्शनचे काम करणाऱ्या जयश्री काकुस्ते (वय 25) या महिलेचा मृतदेह टेंभे वर्धाने शिवारात आढळून आला. दरम्यान जयश्री ही जैताने शिवारातील एका भोंदूकडे पूजेसाठी गेली असल्याची माहिती पोलिसांना मिळाली. यावेळी पोलिसांनी भोंदू योगेश खैरनार याला ताब्यात घेत त्याची चौकशी केली. यावेळी भोंदू योगेश खैरनार याने आपला गुन्हा कबूल केला.

जबरदस्ती केली, किंकाळ्या मारल्या

आपल्याकडे पूजेसाठी आलेल्या जयश्री काकुस्ते या विवाहितेला पूजेनंतर घरी सोडण्यासाठी जात असताना भोंदूने तिच्यासोबत बळजबरी करण्याचा प्रयत्न केला. मात्र जयश्रीने प्रतिकार करत किंकाळ्या मारल्याने तिचा गळा आवळून खून केल्याची कबुली भोंदू योगेश खैरनार याने पोलिसांना दिली आहे. तर जयश्री सोबत पूजेसाठी आलेल्या तिचा मित्र अक्षय सोनवणे याच्यामुळे आपलं बिंग फुटू नये म्हणून अक्षयच्या डोक्यात रॉड टाकून त्याचा खून केलाच पोलीस तपासात समोर आलं आहे. या प्रकरणी निजामपूर पोलिसांनी संशयित भोंदू बाबा योगेश खैरनार याला अटक केली असून त्याच्याविरोधात निजामपूर पोलीस ठाण्यात गुन्हा दाखल करण्यात आला आहे. दरम्यान निजामपूर पोलीस या प्रकरणाचा अधिक तपास करत आहेत.

नारंगी रुमालाने…

शनी अमावस्येच्या रात्री जयश्री आणि अक्षय पूजा करण्यासाठी भोंदू योगेशच्या आश्रमात गेले होते. पण ते परत आलेच नाही. दुसऱ्या दिवशी सकाळी रायपूर-भडगावर रोडवर जयश्रीचा मृतदेहच मिळाला. तिचा चेहरा कपड्याने झाकलेला होता. बाजूला दुचाकी उभी होती. पोलिसांना आधी हा रस्ते अपघात वाटला होता. पण पोलिसांनी अधिक खोलवर तपास केला असता हा खून असल्याचं उघड झालं. जंगलात एका तरुणाचा मृतदेह दफन केलेला दिसला. हा तरुण अक्षय होता. अक्षयच्या मृतदेहा शेजारीच एक नारंगी रुमाल सापडला आणि हा रुमालच हे प्रकरण सोडवण्यासाठी उपयोगी पडला.

पोलिसांनी श्वानांची मदत घेतली. त्यांनी श्वानांना या नारंगी रुमालाचा वास दिला. त्यानंतर हे श्वान थेट भोंदू बाबा योगेश खैरनारच्या आश्रमात गेले. त्यानंतर पोलिसांनी भोंदूबाबाला ताब्यात घेतलं आणि त्याची कसून चौकशी सुरू केली. सुरुवातीला त्याने पोलिसांना वेगळ्याच कहाण्या सांगितल्या. पण पोलिसांनी वर्दीचा खाक्या दाखवताच भोंदू खैरनार पोपटासारखा बोलायला लागला. त्यानंतर त्याने सर्व घटना सांगितली आणि पोलिसांनी या खूनी बाबाला अटक केली.

त्याने पुरावे नष्ट करण्याचा प्रयत्न केल्याची माहितीही समोर आली आहे. अक्षयचा मृतदेह आश्रमाजवळच्या उभानार्डी जंगलात त्याने दफन केला होता. अक्षयचा मृतदेह नेण्यासाठी त्याने बैलगाडीचा वापर केला होता. पोलिसांना मृतदेह दफन केलेल्या जागी बैलगाडीच्या चाकांचे निशाण आढळून आले आहेत. पोलिसांनी आरोपीला पकडलं असून आता वेगवेगळ्या अँगलने या घटनेचा तपास करत आहे.