डोंबिवलीतील खासगी कोव्हिड रुग्णालयातील लिफ्ट कोसळली, चार जण गंभीर जखमी  

dombivali lift accident

डोंबिवली : गेल्या काही दिवसांपासून राज्यभरात कोरोना रुग्णालयात कधी आग लागणे, तर कधी ऑक्सिजनची गळतीसारख्या दुर्दैवी घटना घडत आहेत. नुकतंच डोंबिवलीमधील एका कोव्हिड रुग्णालयात लिफ्ट कोसळल्याची धक्कादायक घटना समोर आली आहे. यावेळी त्या लिफ्टमध्ये असलेले चार कोरोना रुग्ण गंभीर जखमी झाले आहेत. मात्र सुदैवाने कोणतीही जीवितहानी झालेली नाही. या लिफ्टमध्ये तांत्रिक बिघाड झाल्याने ही घटना घडल्याची माहिती रुग्णालय प्रशासनाने दिली आहे. (Dombivli private Covid Hospital Elevator collapses Accident)

नेमकी घटना काय? 

डोंबिवलीमधील कल्याण शीळ रोड या ठिकाणी एस. एस. टी. वैद्यरत्न हे कोव्हिड रुग्णालय आहे. काल संध्याकाळी 9 च्या सुमारास आशा महाजन (43), दिलीप महाजन (56) हे दाम्पत्य आपल्या मुलाला घेऊन रुग्णालयात गेले होते. त्यावेळी महाजन कुटुंबियांसोबत रुग्णालयातील एक महिला कर्मचारी असे चार जण लिफ्टमधून पहिल्या मजल्यावर जात होते.

मात्र पहिल्या मजल्यावर ही लिफ्ट अडकली. त्यावेळी हे चौघेजण घाबरले. त्यांनी लिफ्टचा दरवाजा उघडण्याचा प्रयत्न केला. मात्र त्यावेळी लिफ्ट तळमजल्यावर कोसळली. यावेळी लिफ्टमध्ये असलेल्या चौघांना गंभीर दुखापत झाली.  यानंतर महाजन यांच्या मुलाला त्याच रुग्णालयात उपचारासाठी दाखल करण्यात आलं. तर इतर तिघांवर डोंबिवलीतील खासगी रुग्णालयात उपचार सुरु आहेत.

तांत्रिक बिघाड झाल्याने लिफ्ट कोसळल्याचा दावा

या लिफ्टमध्ये तांत्रिक बिघाड झाल्याने ही दुर्देवी घटना घडली. याबाबत देखभाल दुरुस्ती विभागाला माहिती दिली आहे, अशी प्रतिक्रिया डोंबिवलीतील त्या रुग्णालयाने दिली आहे. तसेच या रुग्णांचा उपचाराचा संपूर्ण खर्च आम्ही करु, असेही रुग्णालय प्रशासनाने सांगितले. (Dombivli private Covid Hospital Elevator collapses)

संबंधित बातम्या : 

कोरोना उपचारांनंतर घरी येताच पाटील मालामाल, ठाण्यातील व्यावसायिकाला पाच कोटींची लॉटरी

केडीएमसीत दोन आणखी स्मशानभूमी उभारुन 24 तास सुरु ठेवणार, महापालिका आयुक्तांचा महत्त्वाचा निर्णय

मुंबई-पुण्यात पालकमंत्री, महापौर, आयुक्त बैठका घेतात, केडीएमसीत पालकमंत्री कुठे? मनसे आमदारांचा खोचक टोला