Navneet Rana : ‘पण त्यांची ती अट मला मान्य नव्हती’, नवनीत राणांचा सुनेत्रा पवारांसोबत झालेल्या चर्चेवर खुलासा
Navneet Rana : राष्ट्रवादी काँग्रेस पार्टीचा राज्यसभेचा उमेदवार आता फायनल झाला आहे. पण त्याआधी या खासदारकीसाठी नवनीत राणा यांच्या नावाची चर्चा होती. नवनीत राणा यांनी सुनेत्रा पवारांसोबत बैठकीत काय चर्चा झाली? यावर खुलासा केला आहे.
राष्ट्रवादी काँग्रेसकडे असलेल्या राज्यसभेच्या एका जागेसाठी चार उमेदवारांच्या नावाची चर्चा होती. नवनीत राणा, छगन भुजबळ, बीडचे अमरसिंह पंडित आणि भंडाऱ्याचे राजेंद्र जैन. या चौघांपैकी अखेर राजेंद्र जैन यांच्या नावावर शिक्कामोर्तब झालं आहे. सुनेत्रा पवार यांच्या राजीनाम्यानंतर राज्यसभेची जागा रिक्त झाली आहे. राज्यसभेच्या या जागेसाठी माजी खासदार, भाजप नेत्या नवतीन राणा यांनी सुनेत्रा पवार यांची भेट घेतली होती. राष्ट्रवादी काँग्रेसकडून राज्यसभेवर जाण्यासाठी नवनीत राणा यांना राष्ट्रवादी काँग्रेस पार्टीत प्रवेशाची अट घालण्यात आली होती. आता नवनीत राणा यांनी फेसबुकवर पोस्ट करुन नेमकी काय चर्चा झाली? त्यांची भूमिका काय आहे? या बद्दल खुलासा केला आहे.
“भारतीय जनता पार्टीची मी प्रामाणिक निष्ठावान कार्यकर्ता आहे. मी कोणत्याही पदासाठी आपली विचारधारा बदलणार नाही. मी सदैव भारतीय जनता पार्टीचे कार्य प्रामाणिकपणे करत राहील” असं सांगून नवनीन राणा यांनी राष्ट्रवादीच्या प्रवेशावर पूर्ण विराम लावला आहे. “आदरणीय सुनेत्रा वहिनी अजितदादा पवार आणि पार्थदादा पवार यांनी मला राज्यसभेवर पाठवण्याबाबत इच्छा व्यक्त केली होती. मात्र राज्यसभेच्या उमेदवारीसाठी राष्ट्रवादी काँग्रेस पक्षात प्रवेश करण्याची अट मला मान्य नव्हती” असं नवनीत राणा म्हणाल्या.
परंतु काही कारणास्तव हे शक्य झाले नाही
“मुख्यमंत्री देवेंद्र फडणवीस यांच्या सूचनेवरून मी सुनेत्रा वहिनी यांची प्रत्यक्ष भेट घेऊन राष्ट्रवादी काँग्रेस पक्षाची राज्यसभेची जागा भारतीय जनता पक्षाला सोडण्याची विनंती केली होती. परंतु काही कारणास्तव हे शक्य झाले नाही. तरी देखील माझ्यावर विश्वास ठेवून मला राज्यसभेची संधी देण्याचा विचार केल्याबद्दल मी सुनेत्रावहिनी अजितदादा पवार यांचे व पार्थ दादा पवार यांची आभारी आहे” असं नवनीत राणा म्हणाल्या.
..म्हणून छगन भुजबळ यांचं राज्यसभेवर जाणं बारगळलं
राष्ट्रवादी काँग्रेसमध्ये वरिष्ठ नेते छगन भुजबळ यांना राज्यसभेवर पाठवण्यासाठी सहमत होते. पण आपण राज्यसभेवर गेल्यानंतर आपला पुतण्या समीर भुजबळ यांना मंत्रिपद मिळावं अशी भुजबळांची इच्छा होती. पण याला भाजप श्रेष्ठींकडून नकार होता.त्यामुळे छगन भुजबळ यांचं राज्यसभेवर जाणं बारगळलं.
