संतापजनक! जळगावात 12 वर्षीय मुलीवर शेतात अत्याचार, पीडितेचा दगडाने ठेचून खून, चोपडा हादरलं!
जळगावच्या चोपडा तालुक्यात शनिवारी माणुसकीला काळीमा फासणारी घटना घडली. रस्त्यावर एका बारा वर्षीय मुलीवर अत्याचार करून तिची दगडाने ठेचून हत्या करण्यात आली आहे. तिच्या लहान बहिणीने हा प्रकार गावकऱ्यांना सांगितल्यानंतर ही घटना उघडकीस आली.
राज्यात महिला आणि मुलींवरील अत्याचाराच्या घटना काही केल्या कमी होताना दिसत नाहीत. बदलापूरच्या घटनेमुळे संपूर्ण देश हादरलेला असताना राज्यातील विविध भागांमधून महिला अत्याचाराच्या घटना समोर येत आहेत. जळगावच्या चोपडा तालुक्यात अशीच एक संतापजनक घटना समोर येत आहे. चोपडा तालुक्यात अवघ्या 12 वर्षाच्या चिमुकलीवर अत्याचार करण्यात आला आहे. आरोपी अत्याचार करुन थांबला नाही तर त्याने पीडित मुलीची दगडाने ठेचून हत्या केली. आरोपीच्या या संतापजनक कृत्यामुळे चोपडा तालुक्यात संतापाची लाट पसरली आहे. आरोपीवर कठोरात कठोर कारवाई करण्यात यावी, अशी मागणी केली जात आहे. पोलिसांनी आरोपीला बेड्या ठोकल्या आहेत.
जळगावच्या चोपडा तालुक्यात शनिवारी माणुसकीला काळीमा फासणारी घटना घडली. रस्त्यावर एका बारा वर्षीय मुलीवर अत्याचार करून तिची दगडाने ठेचून हत्या करण्यात आली आहे. तिच्या लहान बहिणीने हा प्रकार गावकऱ्यांना सांगितल्यानंतर ही घटना उघडकीस आली. आरोपीला पोलिसांनी अटक केली आहे. शेतातील निंदणीचे काम आटोपून पीडिता रस्त्याने आपल्या गावाकडे निघाली होती. पीडितेसोबत तिची लहान बहीणही होती. या दरम्यान शनिवारी सायंकाळी पाच वाजेच्या सुमारास बारा वर्षीय मुलीला आरोपीने एका शेतात ओढून तिच्यावर अत्याचार केला. त्यानंतर घटना उघडकीस येऊ नये म्हणून त्याने तिला दगडाने ठेचून मारुन टाकले. ही घटना 7 सप्टेंबरला सायंकाळी 5 वाजेच्या सुमारास घडली.
पोलिसांनी आरोपीला बेड्या कशा ठोकल्या?
हत्येनंतर आरोपीने अल्पवयीन मुलीला विवस्त्र घटनास्थळावरून १०० फूट ओढत नेत कापसाच्या शेतात फेकून दिल्याचे समोर आले. संबंधित घटनेमुळे परिसरात खळबळ उडाली आहे. पीडितेच्या बहिणीने गावकऱ्यांना याबाबत माहिती दिली. यानंतर गावकऱ्यांनी शोधाशोध केली तेव्हा पीडितेचा मृतदेह सापडला. यानंतर पोलिसांना या घटनेची माहिती मिळाली. पोलिसांनी घटनेचं गांभीर्य ओळखत तातडीने घटनास्थळाला भेट दिली.
पोलिसांनी तातडीने या प्रकरणाचा तपास करण्यासाठी चार पथके तयार केले. ही पथकं तातडीने कामा लागली. या दरम्यान चोपडा-आडगाव रस्त्यावर आरोपी पळून जात असताना पोलिसांच्या हाती लागला. त्याच्यावर पोक्सो कायद्यासह विविध कलमांतर्गत गुन्हा दाखल करण्यात आल्याची माहिती पोलीस निरीक्षक साळवे यांनी दिली आहे. या घटनेनंतर नागरिकांनी आज मोठ्या प्रमाणात आक्रमक होत मूक मोर्चा काढला.
