Kalyan Crime : अनिकेतसोबतच अंत्यसंस्कार करा, चिठ्ठी लिहीत विवाहीतेचं टोकाचं पाऊल, दीड वर्षांपूर्वीच..

कल्याणमधून एक अतिशय धक्कादायक आणि दुर्दैवी बातमी समोर आली आहे. अवघ्या दीड वर्षांपूर्वी प्रेमविवाह केलेल्या, सुखी संसाराची स्वप्न पाहिलेल्या विवाहीतेने टोकाचं पाऊल उचलंत आत्महत्या केली. सर्वात हादरवणारी गोष्ट म्हणजे, काही काळापूर्वीच तिच्या पतीने देखील आत्महत्या केली होती. त्याच्या मागोमाग आता त्याच्या पत्नीनेही आयुष्य संपवलं आहे. मात्र जीव देण्यापूर्वी तिने एक चिठ्ठी लिहून ठेवल्याचे समोर आले आहे. दोषींवर कठोर कारवाई करा, माझ्या आजारी आई-वडिलांची सुटका करा आणि पती अनिकेतसोबतच अंत्यसंस्कार करा , अशा इच्छा तिने या सुसाईड नोटमध्ये लिहील्या आहेत. विवाहीत महिलेने हे टोकाचं पाऊल उचलल्याने हळहळ व्यक्त करण्यात येत असून लाडकी मुलगी सोडून गेल्याने तिच्या कुटुंबियांवर तर दु:खाचा डोंगरच कोसळला आहे.

नेमकं काय घडलं ?

मिळालेल्या माहितीनुसार, श्रुती पवार असं मृत विवाहीत महिलेचं नाव असून अवघ्या दीड वर्षांपूर्वी तिने प्रेमविवाह केला होता. अनिकेत आणि श्रुती हे आनंदी जोडपं होतं. मात्र लग्नानंतर सासरच्या मंडळींकडून तिचा शारीरिक व मानसिक छळ झाल्याचा आरोप करण्यात आला आहे. तसेच या छळाच्या काळात तिचा पती अनिकेत जगताप याने साथ न दिल्याने पती-पत्नी, या दोघांमध्ये दुरावा निर्माण झाला होता. याप्रकरणीत महिला तक्रार केंद्रात वादानंतर अनिकेतने टोकाचं पाऊल उचललं आणि त्याने आत्महत्या केली होती. यामुळे श्रुतीला मोठा धक्का बसला होता.

त्यानंतर श्रुती व तिच्या कुटुंबीयांवर, अनिकेतला आत्महत्येस प्रवृत्त केल्याचा आरोप करत तसेच चोरीचा गुन्हा दाखल करण्यात आला होता. याप्रकरणी श्रुतीच्या आई-वडिलांना अटकही करण्यात आली. एवढी सगळी संकटं येऊनही श्रुती खंबीरपणे उभी होती, लढा देत होती.

उचललं टोकाचं पाऊल, नोटमध्ये काय लिहीलं?

मात्र याचदरम्यान वटपौर्णिमेच्या दिवशी, पत्नीने पतीचा जीव घेतल्याचे खोटे व्हिडिओ सोशल मीडियावर व्हायरल करून बदनामी व मानसिक दबाव टाकण्यात आला. त्यामुळे ती तणावाखाली होती, असं नातेवाईकांनी सांगितलं.याच तणावातून तिने टोकाचं पाऊलच उचलत आत्महत्या केली. मात्र आत्महत्या पूर्वी श्रुतीने सुसाईड नोट लिहीली. दोषींवर कठोर कारवाई करावी, आजारी आई-वडिलांच्या सुटकेची मागणी तिने केली आणि पती अनिकेतसोबतच अंत्यसंस्कार करण्याची इच्छा या नोटमध्ये तिने व्यक्त केली होती. या प्रकरणानंतर श्रुतीचे नातेवाईक संतप्त झाले आहेत. कोळशेवाडी पोलीसांनी गुन्हा दाखल करून घेतला असून पुढील कारवाई सुरू आहे.