राम शिंदेंचा मोठा निर्णय! जिल्हा बँक निवडणुकीतून घेतली माघार; कारणही सांगितलं, म्हणाले- राजकीय दबाव…

अहिल्यानगर जिल्हा मध्यवर्ती सहकारी बँकेच्या निवडणुकीच्या पार्श्वभूमीवर विधान परिषदेचे सभापती राम शिंदे यांनी मोठा निर्णय घेतला आहे. त्यांनी जिल्हा बँकेच्या निवडणुकीतून माघार घेतली आहे. यामुळे त्यांच्या समर्थक आणि कार्यकर्त्यांमध्ये नाराजीची भावना निर्माण झाली आहे. मात्र आपला निर्णय कोणत्याही राजकीय दबावामुळे किंवा व्यक्तिगत कारणामुळे घेतलेला नसल्याचे राम शिंदे यांनी स्पष्ट केले आहे.

विधान परिषदेच्या सभापतीपदावर असताना घटनात्मक पदाची प्रतिष्ठा आणि निष्पक्षता कायम राखणे आवश्यक आहे, अशी भूमिका राम शिंदे यांनी मांडली. याच कारणामुळे आपण जिल्हा बँक निवडणुकीसाठी अर्ज दाखल केला नसल्याचे त्यांनी सांगितले. सभापती म्हणून काम करताना कोणत्याही राजकीय पक्षाच्या किंवा गटाच्या बाजूने झुकल्याचा आभास निर्माण होऊ नये, यासाठी हा निर्णय घेतल्याचे त्यांनी स्पष्ट केले.

राम शिंदे यांच्या माघारीमुळे कर्जत-जामखेड मतदारसंघातील राजकीय समीकरणांबाबतही चर्चा सुरू झाली आहे. मात्र या निर्णयामागे कोणताही राजकीय दबाव नसल्याचे त्यांनी ठामपणे सांगितले. तसेच वैयक्तिक कारणामुळेही आपण निवडणुकीतून माघार घेतलेली नाही, असे त्यांनी स्पष्ट केले. कर्जत-जामखेडमधील दोन संस्थांच्या माध्यमातून आपला ठराव बिनविरोध झाल्याचा दावाही राम शिंदे यांनी केला आहे.

त्यामुळे निवडणुकीतून स्वतः माघार घेतली असली तरी आपल्या समर्थक संस्थांच्या माध्यमातून प्रतिनिधित्व कायम राहणार असल्याचे त्यांच्या भूमिकेतून स्पष्ट होत आहे. राम शिंदे यांच्या या निर्णयानंतर त्यांच्या कार्यकर्त्यांमध्ये मात्र नाराजी पसरली आहे. जिल्हा बँकेच्या निवडणुकीत राम शिंदे यांनी स्वतः मैदानात उतरावे, अशी अपेक्षा त्यांच्या समर्थकांची होती. त्यामुळे अचानक घेतलेल्या माघारीच्या निर्णयावर कार्यकर्त्यांकडून प्रतिक्रिया उमटत आहेत.

एकीकडे घटनात्मक पदाची प्रतिष्ठा आणि निष्पक्षता जपण्यासाठी निवडणुकीपासून दूर राहण्याचा निर्णय, तर दुसरीकडे कार्यकर्त्यांची नाराजी, यामुळे अहिल्यानगर जिल्हा बँकेच्या निवडणुकीला राजकीय रंग चढला आहे. आता राम शिंदे यांच्या माघारीनंतर जिल्हा बँकेच्या निवडणुकीतील पुढील राजकीय घडामोडींकडे लक्ष लागले आहे. तसेच पुढे काय घडतं याकडे सर्वांच्या नजरा आहेत.