‘ओयो’ हॉटेलमध्ये जाताय? नियमात केला महत्त्वाचा बदल, मंत्री बावनकुळेंनी सांगितलं कारण

नागपुरात ‘ओयो’ हॉटेलच्या नियमात मोठा बदल केला आहे. ओयो हॉटेल चालकांना ग्राहकांची नोंद ठेवण्यासह सीसीटीव्ही फुटेज 90 दिवस जतन करावे लागणार आहे. नागपूर पोलीस आयुक्त विश्वास नांगरे पाटील यांनी याबाबत कडक आदेश दिले आहेत. यावर आता मंत्री चंद्रशेखर बावनकुळे यांनी पहिली प्रतिक्रिया दिली आहे. लोकांच्या तक्रारीनंतर नियम लागू केल्याचे त्यांनी सांगितलं.

ओयो हॉटलेच्या नियमात महत्वाचा बदल

मंत्री चंद्रशेखर बावनकुळे यांनी नागपुरात मुख्यमंत्री फडणवस यांची भेट घेतली. यावेळी दोघांमध्ये बराच वेळ बैठक झाली. या बैठकीनंतर माध्यमांशी बोलताना मंत्री चंद्रशेखर बावनकुळे म्हणाले, ‘नागपुरातही ‘ओयो’ हॉटेलचे बोर्ड लागत आहे. त्यामुळे लोक तक्रार करत आहेत, त्यासाठी कडक नियम लागू केले आहेत. आता हॉटेल चालकांना संपूर्ण रेकॉर्ड ठेवावे लागणार आहे. त्याचबरोबर 90 दिवसांचे सीसीटीव्ही फुटेज ठेवावे लागे. त्यांच्यावर पोलीस आणि प्रशासनाचंही कडक लक्ष असणार आहे’.

मनोज जरांगे पाटलांच्या आंदोलनावर मंत्री चंद्रशेखर बावनकुळे काय म्हणाले? 

मनोज जरांगे पाटील यांच्या आंदोलनावरही बावनकुळेंनी भाष्य केलं. मुंबईत गणेशोत्सवात आंदोलन करणे हे कायदा सुव्यवस्था दृष्टीने अवघड आहे. परंतु कायदा सुव्यवस्थेचा प्रश्न निर्माण होणार नाही, याची काळजी घेतली पाहिजे. मुंबईतील आंदोलन राज्याच्या दृष्टीने अयोग्य आहे. देवेंद्र फडणवीस आणि एकनाथ शिंदे यांना मराठा समाजाच्या मागण्या पूर्ण करण्याचा प्रयत्न केलाय. या दोन्ही नेतेमंडळीवर टीकाटीप्पणी केली जात आहे. हे महाराष्ट्राला पटणारं नाही. दोन्ही नेते मराठा समाजाला न्याय देण्याचा प्रयत्न करताहेत. गणेशोत्सव हा सर्वात मोठा सण आहे. दुष्काळसदृश्य परिस्थितीवर बावनकुळे म्हणाले, ‘राज्याच्या दुष्काळाकडे लक्ष घालण्याच्या सूचना मुख्यमंत्र्‍यांनी दिल्यात. दुष्काळावर उपाययोजना करण्याच्याही सूचना दिल्यात. पालकमंत्री दौरे करून संपूर्ण परिस्थितीचा आढावा घेणार आहे’. तसेच या पार्श्वभूमीवर मंत्री बावनकुळे यांची आज जिल्हाधिकाऱ्यांसोबत बैठक देखील होणार आहे.  तर दुसरीकडे शेतकऱ्यांकडून महाराष्ट्रात कोरडा दुष्काळाची घोषणा करा, अशीही मागणी जोर धरू लागली आहे. आता यावर मुख्यमंत्री फडणवीस काय निर्णय घेतात, याकडे साऱ्यांचं लक्ष लागलं आहे.