मोठी बातमी! राष्ट्रवादीचे बडे नेते नाराज, सुनेत्रा पवार यांनी सर्व आमदारांना तातडीने मुंबईत बोलावलं, बैठकीत होणार मोठा निर्णय

राजकीय वर्तुळातून मोठी बातमी समोर येत आहे. राष्ट्रवादी अजित पवार गटामध्ये घडामोडींना वेग आला आहे. रविवारी रात्री राष्ट्रवादीच्या ज्येष्ठ नेत्यांनी केंद्रीय गृहमंत्री अमित शाह यांची भेट घेतली होती. पक्षामध्ये मोठे निर्णय घेतले जात असताना डावललं जात असल्याची तक्रार त्यांनी अमित शाह यांच्याकडे केली होती. सूत्रांकडून मिळालेल्या माहितीनुसार राष्ट्रवादी काँग्रेसच्या वरिष्ठ नेत्यांनी उपमुख्यमंत्री सुनेत्रा पवार आणि पार्थ पवार यांच्याबद्दल अमित शाह यांच्याकडे नाराजी व्यक्त केली होती. त्यानंतर आता राष्ट्रादी अजित पवार गटातून मोठी बातमी समोर येत आहे.

उपमुख्यमंत्री सुनेत्रा पवार यांनी उद्या राष्ट्रवादी काँग्रेसच्या सर्व आमदारांची तातडीने मुंबई बैठक बोलावली आहे.  राष्ट्रवादी काँग्रेस पक्षाच्या आमदारांची उद्या देवगिरी निवासस्थानी संध्याकाळी ७ वाजता बैठक होणार आहे.  आज राष्ट्रवादी काँग्रेस पक्षाच्या कोअर कमिटीची बैठक पार पडत असतानाच उद्या सुनेत्रा पवार यांनी मुंबईमध्ये पक्षाच्या सर्व आमदारांची बैठक बोलावली आहे. तब्बल चार महिन्यानंतर राष्ट्रवादीच्या आमदारांची बैठक बोलावण्यात आली आहे.  सूत्रांकडून मिळत असलेल्या माहितीनुसार या बैठकीत काही मोठे निर्णय होण्याची शक्यता आहे.

बडे नेते नाराज? 

दरम्यान राष्ट्रवादीच्या काही बड्या नेत्यांनी रविवारी रात्री केंद्रीय गृहमंत्री अमित शाह यांची भेट घेतली आहे. या भेटीदरम्यान वरिष्ठ नेत्यांना डावलून पक्षात महत्त्वाचे निर्णय घेतले जात असल्याबद्दल नाराजी व्यक्त केली आहे. सूत्रांकडून समोर आलेल्या माहितीनुसार राष्ट्रवादीच्या या नेत्यांनी उपमुख्यमंत्री सुनेत्रा पवार आणि पार्थ पवार यांच्याबद्दल अमित शाह यांच्याकडे नाराजी व्यक्त केली आहे. तसेच या भेटीमध्ये अर्थखात्याबाबत देखील चर्चा झाल्याची माहिती समोर येत आहे. सध्या पूर्वी राष्ट्रवादीकडे असलेलं अर्थखात आता भाजपकडे आहे. ते खात पुन्हा राष्ट्रवादीला मिळावं या संदर्भात देखील यावेळी चर्चा झाल्याची माहिती समोर येत आहे. दरम्यान त्यानंतर आता सुनेत्रा पवार यांनी राष्ट्रवादीच्या सर्व आमदारांची उद्या मुंबईत बैठक बोलावली आहे. या बैठकीत काही महत्त्वाचे निर्णय घेतले जाण्याची शक्यता आहे.