मोठी बातमी! राज्यातील 5 शिक्षक, पदवीधर निवडणुकीची घोषणा, मतदान अन् मतमोजणी कधी?

राज्यातील 5 शिक्षक आणि पदवीधर निवडणुकीबाबत महत्वाची अपडेट आली आहे. निवडणूक आयोगाने राज्याील पाच शिक्षक, पदवीधर निवडणुकीची घोषणा केली आहे. यामध्ये अमरावती, पुणे , नागपूर, औरंगाबाद विभागाचा समावेश आहे. या निवडणुकीसाठी 23 ऑक्टोबर रोजी मतदान होईल. तर याची मतमोजणी 27 ऑक्टोबर रोजी होईल. निवडणुकीच्या घोषणेमुळे राजकीय हालचालींना वेग येणार आहे.

राज्यात आता निवडणुकीचे पडघम वाजणार आहे. महाराष्ट्रातील पाच विधानपरिषदेच्या जागेच्या निवडणुकीची घोषणा केंद्रीय निवडणूक आयोगाने केली. विधानपरिषदेतील रिक्त होणार्‍या जागांवर निवडणुका होणार आहेत. या विधानपरिषदेच्या निवडणुकीची चर्चा अनेक दिवसांपासून सुरू आहे. या निवडणुकीसाठी अर्ज प्रक्रिया ही 29 सप्टेंबरपासून सुरू होणार आहे. तर 23 ऑक्टोबर रोजी या जागांसाठी मतदान होणार आहे. तर 27 ऑक्टोबर रोजी या निवडणुकीचा निकाल जाहीर करण्यात येणार आहे. ५ जागांवर निवडणूक जाहीर करण्यात आल्याने सर्व राजकीय पक्ष आता जोरदारपणे कामाला लागण्याची शक्यता आहे.

5 जागांवर होणार निवडणूक?

केंद्रीय आयोगाने दिलेल्या माहितीनुसार, बिहारमध्ये विधानपरिषदेच्या 8 जागा रिक्त होणार आहेत. यात 4 शिक्षक आणि 4 पदवीधर मतदारसंघाच्या जागा आहेत. कर्नाटकात 2 पदवीधर आणि 2 शिक्षक मतदारसंघाच्या जागांवर निवडणूक होईल. तर महाराष्ट्रात विधानपरिषदेच्या 5 जागा रिक्त होत आहेत. यात 3 पदवीधर आणि 2 शिक्षक मतदारसंघाचा समावेश आहे. तर उत्तर प्रदेशातही 11 विधानपरिषदेच्या जागांवर निवडणूक होईल. त्यात 5 पदवीधर आणि 6 शिक्षक मतदारसंघाचा समावेश आहे.

महाराष्ट्रातून कोणत्या जागा रिक्त होणार?

महाराष्ट्रातील पाच विधानपरिषद सदस्यांचा कार्यकाळ संपत आहे. औरंगाबाद पदवीधर मतदारसंघाचे सतिश चव्हाण, पुणे पदवीधार मतदारसंघात अरुण लाड, नागपूर पदवीधर मतदारसंघाचे अभिजीत वंजारी, अमरावती शिक्षक मतदारसंघाचे किरण सरनाईक, पुणे शिक्षक मतदारसंघाचे जयंत आसगावकर हे प्रतिनिधित्व करत होते. या पाचही आमदारांचा कार्यकाळ संपणार आहे. त्यामुळे रिक्त होणार्‍या पाच जागांवर निवडणूक होणार आहे. या निवडणुकीसाठी लवकरच सर्व राजकीय पक्षांच्या नेत्यांची एकच धावाधाव पाहायला मिळेल. त्यामुळे कोणत्या जागेवरून कोणाला उमेदवारी मिळणार, याकडे साऱ्यांचे लक्ष असणार आहे.