मरीन ड्राईव्ह ते वांद्रे थेट 12 मिनिटांत… आता वेगवान होणार प्रवास

गेल्या काही महिन्यांत मुंबईमधील अनेक विकासकामांना जोर आला आहे. गेल्या काही वर्षांपासून मुंबईत सुरू असलेले अनेक प्रकल्प पूर्णत्वास येत असून त्यामुळे प्रवासही वेगवान झालायं. पश्चिम उपनगरांमधील वाहतूक सुसाट होण्याच्या दृष्टीने महत्वाचा ठरणारा कोस्टल रोड वांद्रे-वरळी सी लिंकला जोडण्याचं कामंही पूर्ण झालं असून आज या मार्गाचं उद्घाटन होणरा आहे. त्यामुळे मरीन ड्राईव्ह ते वांद्रे अवघ्या 12 मिनिटांत पोचता येणार आहे. दक्षिण मुंबईपासून वांद्रे वरळी सी-लिंकपर्यंत सिग्नलमुक्त , वेगवान प्रवास आता या रस्त्यामुळे शक्य होणार आहे. कोस्टल रोड आणि सी लिंक कनेक्ट झाल्यानं वरळीच्या बिंदु माधव चौकात होणाऱ्या वाहतूक कोंडीतून सुटका होईल.

मुंबई कोस्टल रोड आणि वांद्रे वरळी सीलिंकला जोडणाऱ्या कनेक्टरचे उद्घाटन आज मुख्यमंत्री एकनाथ शिंदे यांच्या हस्ते होणार आहे. त्यानंतर हा मार्ग वाहतुकीसाठी खुला होईल.  या नवीन मार्गामुळे मरीन ड्राईव्ह ते वांद्रे हा प्रवास अवघ्या 12 मिनिटांत करता येईल असा दावा करण्यात येत आहे. या प्रकल्पामुळे आता मुंबईकरांचा प्रवासाचा वेळ आणि इंधनाची बचत होणार आहे.

या प्रकल्पात प्रिन्सेस स्ट्रिट फ्लायओव्हर ते वरळी सी-लिंक असा 10.58 किमी लांबीचा कोस्टल रोड बांधण्यात आला आहे. मरीन ड्राइव्ह ते हाजीअलीपर्यंत 6.25 किमीचा मार्गही सुरू झाला आहे. तर आता याच सागरी मार्गाला पुढे असणारा 4.5 किमी लांबीचा वांद्रे-वरळी सी-लिंक जोडण्यात आला आहे. त्यामुळे मुंबईकरांचा प्रवास वेगवान होणार असून वेळेची मोठी बचत होणार आहे.

या प्रकल्पातील मुख्य टप्पा असलेला 136मीटरचा  पट्टा सर्वांत मोठ्या बो स्टिंग आर्च गर्डरने जोडण्यात आला आहे. दोन हजार मेट्रिक टन वजनाचा महाकाय गर्डर जोडण्यात आला आहे. या प्रकल्पामुळे आता कोस्टल रोड सी-लिंकला वरळी येथे जोडला गेल्याने वांद्रयाहून दक्षिण मुंबईत प्रवास वेगाने करता येणार आहे.  कोस्टल रोड आणि सी लिंक कनेक्ट झाल्यानं वरळीच्या बिंदू माधव चौकात होणाऱ्या वाहतूक कोंडीतून सुटका होईल अशी अपेक्षा आहे.