शिवेंद्रराजेंनी उमेदवारी अर्जच भरला नाही, अजित पवारांच्या दौऱ्याकडेही पाठ

सातारा : राष्ट्रवादी काँग्रेसला मुंबई अध्यक्ष सचिन अहिर यांच्या शिवसेनेत जाण्याने मोठी खिंडार पडली आहे. त्यातच आता इतर काही आमदारही भाजपच्या संपर्कात असल्याचं बोललं जातंय. साताऱ्यात आमदार शिवेंद्रराजे भोसले (MLA Shivendra raje bhosale) यांनी मुलाखतीला दांडी मारल्यामुळे सर्वांच्याच भुवया उंचावल्या आहेत. राष्ट्रवादीचे नेते अजित पवार जिल्ह्यात असताना शिवेंद्रराजे (MLA Shivendra raje bhosale) यांनी पाठ फिरवल्यामुळे त्यांच्या पक्ष सोडण्याच्या चर्चेलाही उधाण आलंय.

शिवेंद्रराजे भोसले यांनी राष्ट्रवादीकडे विधानसभेचा उमेदवारी अर्ज दाखल न केलेला नाही. त्यामुळे राष्ट्रवादीच्या वर्तुळात संदिग्धता वाढली आहे. इच्छुक उमेदवारांच्या मुलाखती घेण्यासाठी सातार्‍याच्या दौर्‍यावर अजित पवार आले असताना शिवेंद्रराजे या मुलाखतीला अनुपस्थित राहिले. राष्ट्रवादीने सातारा जिल्ह्यात अधिक लक्ष दिलंय. त्याचाच एक भाग म्हणून राष्ट्रवादी भवनामध्ये इच्छुकांच्या मुलाखती घेतल्या गेल्या. ही प्रक्रिया अजित पवार यांच्या उपस्थितीत पार पडली.

राष्ट्रवादीने जिल्ह्यातील आठही विधानसभा मतदारसंघासाठी इच्छुक उमेदवारांचे ऑनलाईन आणि ऑफलाईन अर्ज मागवले होते. त्यानुसार 13 इच्छुकांनी ऑफलाईन, तर काही इच्छुकांनी ऑनलाईन अर्ज सादर केले. त्यामध्ये पक्षाच्या विद्यमान आमदारांपैकी केवळ शिवेंद्रराजे भोसले यांचाच अर्ज दाखल झालेला नाही. त्यामुळे सातारा, जावलीचे कार्यकर्ते आणि पदाधिकारीही बुचकळ्यात पडले आहेत.

शिवेंद्रराजे यांनी भाजपमधून लढण्याबाबतही काही कार्यकर्त्यांचा आग्रह आहे. खासदार उदयनराजे भोसले यांनीही पक्षाकडे उमेदवारी अर्ज दाखल केला नव्हता, तरीही पक्षाने त्यांना उमेदवारी दिली. तिच भूमिका शिवेंद्रराजेंनी घेतली तर काय चुकले? असा सूर शिवेंद्रराजेंच्या कार्यकर्त्यांचा उमटत आहे. मात्र अजित दादांनी पत्रकारांनी विचारलेल्या प्रशनावर त्यांनी स्वत:हा मुलाखत फॉर्म भरला नसल्याचं सांगून याचा चुकीचा अर्थ घेऊ नये असं ते म्हणाले.

राजकीय विश्लेषकांच्या मते, शिवेंद्रराजेंच्या सातारा – जावळी मतदारसंघात निवडणूक लढवण्याची भाषा करणार्‍यांबाबत (शशिकांत शिंदे) पक्ष दखल घेत नाही. शिवेंद्रराजे भोसले यांचे बंधू उदयनराजे भोसले हे देखील त्यांच्या विरोधात काम करत आहेत. शिवेंद्रराजेंच्या कार्यकर्त्यांनी भाजप पक्ष प्रवेशाबाबत शिवेंद्रराजेंकडे जोर लावलाय. मात्र शिवेंद्रराजेंनी याबाबत बोलण्यास नकार दिलाय.