‘पवार साहेबांचा दम म्हणजे…’ निलेश लंकेंनी सांगितला खास किस्सा, शरद पवारांनाही आलं हसू

पुण्यात आज राष्ट्रवादी शरद पवार पक्षाचा २६ वा वर्धापन दिनाचा कार्यक्रम पार पडला. या कार्यक्रमाला पक्षातील आमदार खासदारांसह हजारो कार्यकर्ते उपस्थित होते. यावेळी पक्षातील अनेक नेत्यांनी भाषणे केली. मात्र अहिल्यानगचे खासदार निलेश लंके यांचे भाषण सर्वात जास्त गाजले. या भाषणात खासदार निलेश लंके यांनी एक किस्सा सांगितला. तो ऐकल्यावर शरद पवारही खळखळून हसले. तो किस्सा काय होता ते जाणून घेऊयात.

निलेश लंकेंनी सांगितला किस्सा

निलेश लंकेंनी शरद पवार कसा दम देतात याचा किस्सा सांगितला. लंके म्हणाले, ‘पवार साहेबांचा दम हा “ये तुला पाहुन घेतो” असा तुमच्याआमच्यासारखा नाही. साहेब म्हणतात “तुम्ही जर चुकीच्या पद्धतीने वागले तर आम्हाला विचार करावा लागेल”, याच्यात लय दम आहे.माझ्यासमोर साहेबांनी एका हस्तीला सांगितलं होतं की, लंके हा माझा कार्यकर्ता आहे. तो लोकवर्गणीतून विधानसभेची निवडणूक लढवत आहे, त्याला जर चुकीच्या पद्धतीने त्रास देण्याचा प्रयत्न केला तर पाहू आपण, त्यानंतर तो काही महिनाभर झोपला नसेल.” हा किस्सा ऐकून शरद पवारही खळखळून हसले.

शरद पवार ५५ वर्षांपासून देशाच्या राजकारणात

पुढे बोलताना निलेश लंके म्हणाले की, साहेब हसले का आणि ते गप्प का हे समजत नाही. साहेब हसलेलं हे कळालं तर टांगेखालून जाईल आणि गप का हे समजलं तर लोटांगण घालेन. हे कुणाला समजलं नाही म्हणून साहेब ५५ वर्षांपासून देशाच्या राजकारणात टिकून आहेत असंही लंके यांनी म्हटलं.

आपण हाफ चड्डीवर फिरत होतो तेव्हा पवार साहेब… 

आपल्या भाषणात पुढे बोलताना लंके यांनी सांगितलं की, ‘राजकारणामध्ये कधी दिवस बदलतील सांगता येत नाही. काहींना लय घाई झाली. आपला नेता आहे ना, आपलं वय नाही तेवढा नेत्याचा अनुभव आहे. नेत्याला सगळी गणित जुळतात, आपण हाफ चड्डीवर फिरत होतो तेव्हा आपला नेता महाराष्ट्राचं नाहीतर देशाचं राजकारण करत होता.’