शिवसेना ठाकरे गटातील फुटीनंतर पहिल्यांदाच खासदार संजय जाधव समोर, नेमकं काय म्हणाले?

परभणीमध्ये मोठी दुर्घटना घडली आहे. परभणीमधील यशवाडीमध्ये हनुमान मंदिराच्या परिसरात सभामंडप कोसळून 6 जणांचा मृत्यू झाला आहे. तर या घटनेत 30 – 40 भाविक जखमी झाले आहेत. घटनेची माहिती मिळताच याठिकाणी बचावकार्य सुरू करण्यात आलं आहे. या घटनेत 7 ते 8 भाविक गंभीर जखमी झाल्याची माहिती समोर येत आहे. दरम्यान या सर्व पार्श्वभूमीवर परभणीचे खासदार संजय जाधव यांनी या घटनेची माहिती दिली आहे. पदाधिकाऱ्यांशी संर्पक साधून तातडीने घटनास्थळी मदत पोहोचवण्याच्या सूचना दिल्याचं त्यांनी म्हटलं आहे.

नेमकं काय म्हणाले संजय जाधव? 

परभणी जिल्ह्यातील जागृती देवस्थान यशवाडी याठिकाणी मोठी दुर्घटना घडली आहे. अर्धवट बांधकाम झालेला सभामंडप कोसळला आहे. या दुर्घटनेत अनेक जण ढिगाऱ्याखाली अडकले आहेत. घटनास्थळी बचावकार्य सुरू आहे, काही लोकांना बाहेर काढण्यात आलं आहे, काही लोक हे अजूनही ढिगाऱ्याखाली अडकले आहेत. या घटनेत काही लोकांनी आपला जीव गमावला आहे. दुर्घटना मोठी आहे, मी सर्व पदाधिकारी, जिल्हा शल्यचिकित्सक आणि सर्वांना आवाहन करतो, की या दुर्घटनेत जे जखमी लोक आहेत, त्यांना तातडीने वैद्यकीय मदत उपलब्ध करून द्यावी, जखमी लोकांवर तातडीने उपचार सुरू करावेत. तुम्हाला कोणतीही मदत लागली तर सर्व प्रकारची मदत तातडीने उपलब्ध करून दिली जाईल, सर्वांनी या कठीण प्रसंगात सहकार्य करावं असं यावेळी बंडू जाधव यांनी म्हटलं आहे.

6 जणांचा मृत्यू  

दरम्यान या दुर्घटनेत सभा मंडपाखाली अडकल्यामुळे 6 जणांचा मृत्यू झाल्याची माहिती समोर येत आहे. तर सात ते आठ जण गंभीर जखमी आहेत. जखमींना उपचारासाठी रुग्णालयात दाखल करण्यात आलं आहे. घटनास्थळी बचाव कार्य सुरू आहे, हा सभा मंडप कोसळून त्यामध्ये 30 ते 40 जण दबले गेले होते, त्यातील काही जणांना बाहेर काढण्यात आलं आहे, तर उर्वरीत लोकांना ढिगाऱ्याखालून बाहेर काढण्याचं काम सुरू आहे. सभा मंडप कोसळतानाची घटना  सीसीटीव्ही कॅमेऱ्यात कैद झाली आहे.