MPSC आंदोलनाबाबत मोठी अपडेट! राज ठाकरे मैदानात उतरणार; पुण्यात विद्यार्थ्यांची भेट घेणार, तारीख आली समोर

महाराष्ट्र लोकसेवा आयोगाच्या कारभाराविरोधात पुण्यात सुरू असलेल्या विद्यार्थी आंदोलनाला आता मनसे अध्यक्ष राज ठाकरे भेट देणार आहेत. येत्या सोमवारी, ५ ऑक्टोबर रोजी राज ठाकरे पुण्यातील आंदोलनस्थळी जाऊन उपोषणाला बसलेल्या MPSC विद्यार्थ्यांची भेट घेणार असल्याची माहिती समोर आली आहे. MPSC परीक्षेतील कथित अनियमितता, पेपरफुटीचे प्रकरण, रखडलेली भरती प्रक्रिया आणि आयोगाच्या कारभाराबाबत विद्यार्थ्यांमध्ये नाराजी आहे.

या पार्श्वभूमीवर विद्यार्थ्यांनी पुण्यात आंदोलन सुरू केले आहे. आंदोलनादरम्यान MPSC अध्यक्ष विवेक भिमनवार यांच्या राजीनाम्याची मागणीही करण्यात येत आहे. मुख्यमंत्री देवेंद्र फडणवीस आणि MPSC विद्यार्थी प्रतिनिधींची बैठक झाल्यानंतर आंदोलनाला तात्पुरती स्थगिती देण्याचा निर्णय घेण्यात आला होता. या बैठकीत विद्यार्थ्यांच्या विविध मागण्यांवर चर्चा झाली.

सचिवांची बदली, परीक्षा प्रक्रिया ऑफलाइन करण्याबाबतचे आश्वासन आणि आयोगाच्या अध्यक्षांच्या चौकशीसंदर्भात सरकारकडून भूमिका मांडण्यात आली होती. मात्र, त्यानंतर आंदोलनाच्या एका गटाने पुन्हा आंदोलन सुरू केले आहे. त्यामुळे पुण्यात MPSC आंदोलनाचा मुद्दा पुन्हा चर्चेत आला आहे. याच पार्श्वभूमीवर राज ठाकरे सोमवारी पुण्याकडे रवाना होणार आहेत. मुंबईतील नियोजित मोर्चा झाल्यानंतर ते पुण्यात पोहोचतील.

सकाळी आंदोलनस्थळी जाऊन उपोषण करणाऱ्या विद्यार्थ्यांची भेट घेतील आणि त्यांच्या मागण्या तसेच आंदोलनाची सद्यस्थिती जाणून घेतील. राज ठाकरे विद्यार्थ्यांशी चर्चा केल्यानंतर त्यांच्या आंदोलनाबाबत काय भूमिका मांडतात, याकडे आता लक्ष लागले आहे. MPSCच्या परीक्षा आणि भरती प्रक्रियेतील पारदर्शकता, विद्यार्थ्यांच्या मागण्या आणि आयोगाच्या कारभारावरून सुरू असलेल्या या आंदोलनात राज ठाकरे यांच्या भेटीमुळे पुढील राजकीय प्रतिक्रिया काय उमटतात, हे पाहणे महत्त्वाचे ठरणार आहे.