Mumbai Local Train Pass : लोकल पाससाठी पहिल्याच सत्रात 18 हजार नागरिकांची तपासणी, तर 17 हजारापेक्षा अधिक पास वितरित
आज सकाळपासून मुंबई महानगरपालिका क्षेत्रातील 53 रेल्वे स्थानकांवर 358 मदत कक्ष सुरु करण्यात आले आहेत. मुंबईच्या महापौर किशोरी पेडणेकर तसंचअतिरिक्त महानगरपालिका आयुक्त (पश्चिम उपनगरे) सुरेश काकाणी यांनी रेल्वे स्थानकांवर भेटी देऊन या प्रक्रियेची पाहणी केली. दुपारी 3 वाजेपर्यंत 18 हजाराहून अधिक नागरिकांची पडताळणी पूर्ण झाली.
मुंबई : मुंबईतील सर्वसामान्य नागरिकांना येत्या स्वातंत्र्य दिनी म्हणजे 15 ऑगस्ट 2021 पासून उपनगरीय रेल्वे प्रवास अर्थात लोकल प्रवास करण्यास मुभा देण्याची घोषणा मुख्यमंत्री उद्धव ठाकरे यांनी केली आहे. यानुसार आज सकाळपासून मुंबई महानगरपालिका क्षेत्रातील 53 रेल्वे स्थानकांवर 358 मदत कक्ष सुरु करण्यात आले आहेत. मुंबईच्या महापौर किशोरी पेडणेकर तसंचअतिरिक्त महानगरपालिका आयुक्त (पश्चिम उपनगरे) सुरेश काकाणी यांनी रेल्वे स्थानकांवर भेटी देऊन या प्रक्रियेची पाहणी केली. दुपारी 3 वाजेपर्यंत 18 हजाराहून अधिक नागरिकांची पडताळणी पूर्ण झाली. तर याच अनुषंगाने आज दुपारपर्यंतच्या पहिल्या सत्रात रेल्वे प्रशासनाद्वारे 17 हजार 758 मासिक पास वितरित केले आहेत. (Passes distributed to public for Mumbai local travel)
प्रभादेवी, दादर स्टेशनवर महापौरांकडून पाहणी
ज्या नागरिकांना कोविड लशीचे दोन डोस घेतल्यानंतर 14 दिवस पूर्ण झाले आहेत, त्यांचे लसीकरण अंतिम प्रमाणपत्र व छायाचित्र असणारे ओळखपत्र पडताळण्यात येत आहे. या ऑफलाईन पडताळणीमध्ये पात्र ठरलेल्यांना रेल्वेकडून मासिक पास दिला जात आहे. त्याआधारे उपनगरीय रेल्वे प्रवासाची मुभा देण्यात आली आहे. महापौर श्रीमती किशोरी किशोर पेडणेकर यांनी पश्चिम रेल्वे मार्गावरील प्रभादेवी रेल्वे स्थानक आणि दादर रेल्वे स्थानकावर या प्रक्रियेची पाहणी केली. तसंच दादर (पश्चिम) रेल्वे स्थानकावरील मदत कक्षास महापौरांनी भेट दिली. महापौरांनी यावेळी कोविड लसीकरण प्रमाणपत्र आणि ओळखपत्र घेऊन आलेल्या सर्वसामान्य रेल्वे प्रवाशांशी संवाद साधला. ऑफलाईन पडताळणी प्रक्रिया पार पाडताना येणारे रेल्वे प्रवासी आणि मदत कक्षावरील कार्यरत कर्मचारी यांनी देखील कोविड संसर्गाचा प्रादुर्भाव होणार नाही, या दृष्टीने काळजी घेण्याचा सल्लाही महापौरांनी दिला.
१५-८-२१ पासून सर्वसामान्य नागरिकांसाठी सुरु होणाऱ्या उपनगरीय रेल्वे प्रवासासाठी कोविड लसीकरण पूर्ण झालेल्यांची online पडताळणी प्रक्रिया आज पासून @mybmc क्षेत्रातील एकूण५३रेल्वेस्थानकांवर सुरू करण्यात आली आहे.या सुविधेची #दादर रेल्वे स्थानकांना भेटी देऊन पाहणी केली . pic.twitter.com/l78JEzU4wM
— Kishori Pednekar (@KishoriPednekar) August 11, 2021
पहिल्या सत्रात 17 हजार 758 मासिक पास वितरित
दरम्यान, मुंबई महानगरपालिका क्षेत्रात एकूण 53 रेल्वे स्थानकांवर मिळून 358 मदत कक्ष कार्यान्वित झाले आहेत. आज दुपारी 3 वाजेपर्यंतच्या पहिल्या सत्रात या सर्व 53 स्थानकांवर मिळून एकूण 18 हजार 324 रेल्वे प्रवाशांची पडताळणी पूर्ण करण्यात आली आहे. या पडताळणीनंतर नागरिकांना मासिक पास देण्याच्या कार्यवाहीची सुरुवात देखील रेल्वे प्रशासनाद्वारे करण्यात आली आहे. याबाबत रेल्वे प्रशासनाद्वारे देण्यात आलेल्या माहितीनुसार आज दुपारपर्यंत पहिल्या सत्रात 17 हजार 758 मासिक पास देण्यात आले आहेत. यामध्ये मध्य रेल्वेद्वारे 12 हजार 771, तर पश्चिम रेल्वेद्वारे देण्यात आलेल्या 4 हजार 987 मासिक पासांचा समावेश आहे.
दररोज सकाळी 7 ते रात्री 11 वाजेपर्यंत सलग 2 सत्रामध्ये मदत कक्ष कार्यरत असणार आहेत. यामुळे विनाकारण गर्दी न करता नागरिकांनी आपल्या घराजवळील रेल्वे स्थानकांवर पडताळणीकरिता जावे, असे आवाहन पुनःश्च महानगरपालिका प्रशासनाच्या वतीने करण्यात येत आहे.
संबंधित बातम्या :
Passes distributed to public for Mumbai local travel
