Chandrashekhar Bawankule : सुनेत्रा पवारांची मुख्यमंत्र्यांसोबत तब्बल दीड तास चर्चा, त्यावर बावनकुळे यांचं सूचक भाष्य, एनडीएचे पार्टनर..

डिलिमिटेशनला सुप्रिया सुळे यांचा पाठिंबा आहे, पण काँग्रेसचा विरोध आहे. यावर महसूल मंत्री चंद्रशेखर बावनकुळे व्यक्त झाले आहेत. “डिलिमिटेशनला पाठिंबा देणं हेच खऱ्या अर्थाने या देशाकरता निवडणुकीत महत्वाचं आहे. कारण एक-एक मतदारसंघ बघा. रामटेक लोकसभा मतदारसंघ बघा, सहाविधानसभा मतदारसंघ त्यात येतात. इतक्या मोठ्या मतदारसंघात काम करणं खासदारासाठी सुद्धा कठीण आहे. विधानसभेचा विचार केला, तर कामठी विधानसभेत 5.50 लाख मतं येतात. एक आमदार इतका मोठा मतदारसंघ कसा काय कव्हर करु शकतो” असा सवाल चंद्रशेखर बावनकुळे यांनी विचारला.

“जेवढे छोटे मतदारसंघ तेवढा विकास चांगला, जेवढा छोटा मतदारसंघ तेवढा संपर्क चांगला. जास्तीत जास्त लक्ष. लोकप्रतिनिधी विकासासाठी महत्वाचे असतात. जास्तीत जास्त लोकप्रतिनिधी सरकारमध्ये असण्याचा एक मोठा फायदा सरकारी योजना पोहोचवण्यासाठी होतो. डिलिमिटेशनचा जो कायदा आहे, तो मान्य करणं महत्वाचं आहे. लोकसभेला, विधानसभेला डिलिमिटेशन होणं महत्वाचं आहे. आमच्या बहि‍णींसाठी 33 टक्के आरक्षण महत्वाचं आहे” असं चंद्रशेखर बावनकुळे म्हणाले.

ही सकारात्मक गोष्ट आहे

राष्ट्रवादीच्या विलिनीकरणाची चर्चा सुरु आहे, सुनेत्रा पवार यांनी मुख्यमंत्री फडणीसांची भेट घेतली, दोघांमध्ये तब्बल दीडतास चर्चा झाली. त्यावर चंद्रशेखर बावनकुळे यांनी सूचक वक्तव्य केलं. “एनडीएचे पार्टनर वाढत असतील तर भाजपसाठी चांगलं आहे. जास्तीत जास्त लोक एनडीएमध्ये येणं, एनडीए मजबूत होणं हे आमच्यासाठी महत्वाचं आहे. ही सकारात्मक गोष्ट आहे. एनडीएमध्ये जास्तीत जास्त पार्टनर असले पाहिजेत. पुढच्या विकासासाठी, विकसित देशाकरीता जास्तीत जास्त लोकांचा सहभाग महत्वाचा आहे” असं चंद्रशेखर बावनकुळे म्हणाले.

त्यांचं नेतृत्व विजनलेस आहे

शरद पवार गटातले सत्तेसाठी हपापलेले लोक सत्तेसोबत जात आहेत, अशी टीका काँग्रेसने केलीय. त्यावर चंद्रशेखर बावनकुळे म्हणाले की, “काँग्रेस पार्टी किंचित, किंचित होत चाललीय. इंडिया आघाडीला आपले पार्टनर संभाळता येत नाहीयत. इंडिया आघाडीमधला जो मुख्य पक्ष आहे काँग्रेस, तो विजनलेस आहे, त्यांचं नेतृत्व विजनलेस आहे”