Tv9 मराठी स्पेशल रिपोर्ट : अरविंद केजरीवालांचं राजीनामास्त्र, पुढचा मुख्यमंत्री कोण?
दिल्लीचे मुख्यमंत्री अरविंद केजरीवालांनी जेलबाहेर आल्यानंतर मोठी घोषणा केलीय. येत्या दोन दिवसात मुख्यमंत्रिपदाचा राजीनामा देणार असल्याचं अरविंद केजरीवालांनी म्हटलंय.
तुरुंगांतून जामिनावर बाहेर आल्यानंतर दिल्लीचे मुख्यमंत्री अरविंद केजरीवालांनी एक मोठी घोषणा केलीय. दोन दिवसानंतर दिल्लीच्या मुख्यमंत्रिपदाचा राजीनामा देणार असल्याची घोषणा अरविंद केजरीवालांनी कार्यकर्त्यांसमोर केलीय. दरम्यान अरविंद केजरीवालांनी केलील घोषणा म्हणजे स्टंटबाजी असल्याचं म्हणत भाजपनं पलटवार केलाय. महाराष्ट्रासोबत दिल्लीच्या देखील निवडणुका घेण्यात याव्यात अशी मागणी देखील अरविंद केजरीवाल यांनी केलीय. तसंच निवडणुका होईपर्यंत आपचा दुसरा नेता मुख्यमंत्रिदाच्या खूर्चीवर बसणार असल्याचंही केजरीवालांनी म्हटलंय.
अरविंद केजरीवालांनी मुख्यमंत्रिपदाचा राजीनामा देण्याची घोषणा केल्यानंतर आपमधून कोणाची नावं मुख्यंत्रिदासाठी चर्चेत आहे. त्यामध्ये गोपाल राय हे आम आदमी पार्टीचे संयोजक आहेत. केजरीवालांच्या अनुपस्थितीत ते पक्ष संघटनेचं कामकाज पाहतात. आतिशी मार्लेना दिल्लीच्या सार्वजनिक बांधकाम व शिक्षणमंत्री म्हणून काम पाहत आहेत. कैलाश गहलोत यांच्याकडे एकूण आठ खाती आहेत. यामध्ये कायदा, न्याय व विधीमंडळ व्यवहार, वाहतूक, प्रशासकीय सुधारणा, माहिती व तंत्रज्ञान, महसूल, वित्त आणि नियोजन या खात्यांचा समावेश आहे. सौरभ भारद्वाज यांच्याकडे सध्या दक्षता, सेवा, आरोग्य, उद्योग, शहरी विकास आणि पूर नियंत्रण आणि पाणी पुरवठा मंत्रालयाचा कारभार आहे. इम्रान हुसैन यांच्याकडे अन्न व नागरी पुरवठा मंत्रालयाचा कारभार आहे.
पाहा व्हिडीओ:-
अरविंद केजरीवालांनी महाराष्ट्रासोबत दिल्लीच्या निवडणुका घेण्याची मागणी केलीय. मात्र, 2020च्या दिल्लीच्या निवडणुकीतलं नेमकं गणित काय होतं. 2020च्या विधानसभेत आपनं एकहाती सत्ता मिळवली. आम आदमी पक्षाला दिल्लीत 62 जागांवर दणदणीत यश मिळालं. तर भाजपला केवळ 8 जागा जिंकता आल्यात तर काँग्रेसला खातं देखील खोलता आलं नव्हतं.
2024मध्ये आपची स्थिती बघितली तर आपला 2 आमदारांना सोडचिठ्ठी दिली. त्यातील एका आमदारानं भाजपात पक्षप्रवेश केला तर दुसऱ्या आमदारानं काँग्रेसला हात धरलाय. त्यामुळे आपकडे सध्या 62मधून केवळ 60 आमदार उरले आहेत. अरविंद केजरीवाल दोन दिवसानंतर मुख्यमंत्रिपदाचा राजीनामा देणार आहेत.. त्यामुळे त्यांच्या राजीनाम्यानंतर दिल्लीचा नवा मुख्यमंत्री कोण होणार? तसंच महाराष्ट्राबरोबर निवडणुका घेण्याची केजरीवालांची मागणी पूर्ण होणार का? ते पाहावं लागणारय.
