Tardeo Estate Agent: तो फ्लॅट वारकऱ्याचा..; जाहिरात अंगाशी आल्यानंतर इस्टेट एजंट भावेश कावरेची सारवासारव

रिअल इस्टेट एजंट भावेश कावरेच्या एका व्हिडीओवरून सोशल मीडियावर मोठा वाद निर्माण झाला आहे. तुम्ही मांसाहार करत असाल तर ताडदेवमध्ये तुम्हाला घर मिळणार नाही, असं तो या व्हिडीओत म्हणतोय. यावरून नेटकऱ्यांनी तीव्र संताप व्यक्त केला असून त्या व्हिडीओवर आता भावेश कावरेनं स्पष्टीकरण दिलं आहे. “ऐंशी टक्के लोक मांसाहार करतात, वीस टक्के लोक अजूनही शाकाहारी आहेत. त्यांच्यासाठीच मी हा व्हिडीओ बनवला आहे. काहींना नॉनव्हेज आवडत नाही, मांसाहाराच्या वासाचाही त्रास होतो. इथे मराठी माणसाचा मुद्दाच नाही. त्याला मुद्दा बनवला जातोय. मला स्वत:ला भेदभाव पटत नाही,” असं तो म्हणाला. इतकंच नव्हे तर तो फ्लॅट एका मराठी माणसाचा होता, तो वारकरी असून त्याची श्रद्धा होती की हा फ्लॅट शाकाहारी लोकांकडेच जावा, असंही स्पष्टीकरण त्याने दिलं आहे.

काय म्हणाला भावेश?

“शाकाहारी असाल तर महाराष्ट्र सोडून द्या, असा मुद्दा जाणूनबुजून बनवला जातोय. माझं स्वत:चं चिकनचं दुकान आहे आणि गेल्या चाळीस वर्षांपासून आम्ही ते दुकान चालवतोय. याचा अर्थ असा नाही की मी लोकांना बळजबरीने मांसाहार भरवेन. तो फ्लॅट कुठे आणि कोणाला विकायचा हे मी नाही तर मालक ठरवतात. मला हा भेदभाव पटत नाही. त्या व्हिडीओत मी कुठेही मराठीचा उल्लेख केला नाही. ज्यांना मुद्दा बनवायचा आहे, ते मुद्दा बनवत आहेत. काही राजकारणी म्हणतायत की त्याला ठोका. मी मराठी माणूस, लोकांना रोजगार देतोय, तरीसुद्धा माझ्याच विरोधात अशा धमक्या दिल्या जात आहेत. मराठी माणूसच मराठी माणसाचे पाय खेचतोय,” असं भावेश कावरे ‘टीव्ही 9 मराठी’शी बोलताना म्हणाले.

याविषयी तो पुढे म्हणाला, “जो फ्लॅटचा मालक आहे तोच ठरवेल की तो फ्लॅट कोणाला द्यायचा आणि कोणाला नाही. मी ठरवणारा कोणीच नाही. त्यातच एक महान नेता आपल्या युवाला असं बोलतोय की, दिसेल तिथे ठोका. हे कितपत योग्य आहे? मी छत्रपती शिवाजी महाराजांना मानणारा मावळा आहे. त्यांच्या राज्यातही शाकाहारी आणि मांसाहारी लोकंही होते.”

जाहिरातीच्या व्हिडीओवरून होणारा वाद पाहता अखेर भावेशने इन्स्टाग्रामवर त्याचा व्हिडीओ हटवला आहे.