Tardeo Estate Agent: अशा दलालांना दिसेल तिथे ठोकलं पाहिजे..; एजंट भावेश कावरेला वरुण सरदेसाईंची थेट धमकी

सोशल मीडियावर रिअल इस्टेट एजंट भावेश कावरेचा एक व्हिडीओ चर्चेत आला आहे. तुम्ही मांसाहार करत असाल तर ताडदेवमध्ये तुम्हाला घर मिळणार नाही. तुम्ही शाकाहारी असाल तर तुम्हाला घर मिळेल, असं तो या व्हिडीओत म्हणतोय. या व्हिडीओवर नेटकऱ्यांनी तीव्र संताप व्यक्त केला आहे. याच व्हिडीओवर आता शिवसेना ठाकरे पक्षाचे आमदार वरुण सरदेसाई यांनी कमेंट केली आहे. असल्या जाहिराती करणाऱ्या दलालांना दिसेल तिकडे ठोकला पाहिजे, असं थेट त्यांनी या कमेंटमध्ये म्हटलंय.

सोशल मीडियावर व्हायरल होणाऱ्या या व्हिडीओमध्ये रिअल इस्टेट एजंट भावेश कावरे हा ताडदेव परिसरातील एका घराबद्दल माहिती देताना दिसतोय. तुम्ही मांसाहार करत असाल तुम्हाला ताडदेवमध्ये घर मिळणार नाही, तुम्ही शाकाहारी असाल तर तुम्हाला घर मिळेल, असं या व्हिडीओमध्ये तो म्हणतोय. कोणी काय खावं आणि काय खाऊ नये, हे ठरवणारे एजंट कोण, असा सवाल नेटकऱ्यांनी उपस्थित केला आहे. ‘ही मुंबई मराठी माणसाची आहे. आगरी-कोळी बांधवांची आहे. महाराष्ट्राच्या कष्टकरी, सर्वसामान्य माणसाची आहे. आणि मुंबईत कोणी काय खावं, काय खाऊ नये हे ठरवणारे तुम्ही कोण,’ अशा शब्दांत नेटकऱ्यांनी राग व्यक्त केला आहे.

मांसाहारी लोकांना मुंबईत घरं नाकारल्याची ही काही पहिलीच वेळ नाही. याआधी घाटकोपर, मुलुंड यांसारख्या भागांतही मांसाहार नागरिकांना घरं मिळवताना अनेकदा अडचणींचा सामना करावा लागला आहे. आता ताडदेवमधील या व्हिडीओमध्ये पुन्हा हा मुद्दा चर्चेत आला आहे. भावेश कावरेच्या या व्हिडीओवरून पुन्हा वाद पेटला आहे.

“हा जो ब्रोकर आहे, तो आमच्या ताडदेवच्या शिवसैनिकांना आता कळेलच. त्याचा आम्ही नीट समाचार घेऊच. म्हणजे आता ब्रोकर लोकं पोट धरतात, त्यांना चरबी येऊ लागली आहे का? आता गुजराती, मारवाडी किंवा जैन लोकांच्या, जे कोणी बिल्डर आहेत, त्यांची भाषा आता ब्रोकर पण बोलत असेल तर त्याचा समाचार आम्ही घेऊ,” अशा इशारा किशोरी पेडणेकर यांनी दिला आहे.