Navneet Rana: राणा दाम्पत्यांच्या घरावर कारवाई होणार?, पालिका अधिकाऱ्यांची आधी नोटीस, नंतर पाहणी आता पुन्हा पाहणी

मुंबई: अमरावतीच्या खासदार नवनीत राणा (Navneet Rana) आणि त्यांचे आमदार पती रवी राणा (ravi rana) यांच्या मागील अडचणींचा सिसेमिरा काही सुटताना दिसत नाहीये. हनुमान चालिसा (hanuman chalisa) प्रकरणातून सुटका झाल्यानंतर आता राणा दाम्पत्यांच्या मागे घरातील अनधिकृत बांधकामांचं शुक्लकाष्ठ लागलं आहे. राणा दाम्पत्यांनी खार येतील घरात अनधिकृत बांधकाम केल्याचा पालिकेला संशय आहे. त्यामुळे पालिकेचे अधिकारी आज राणा यांच्या घरी जाऊन पाहणी करणार आहेत. यापूर्वीही पालिकेचे अधिकारी राणा यांच्या घरी गेले होते. या अधिकाऱ्यांनी राणा यांच्या घराची पाहणी करून नोटीस बजावली होती. मात्र, राणा दाम्पत्य तुरुंगात असल्याने पालिका अधिकारी घरातील बेकायदा बांधकामांवर कारवाई करू शकले नव्हते. आता मात्र, राणा दाम्पत्य घरी आल्याने आज पुन्हा एकदा पालिकेचे अधिकारी त्यांच्या घरी जाणार असून घरातील बेकायदा कामांची पाहणी करून अहवाल तयार करणार असल्याचं सूत्रांनी सांगितलं.

खारमध्ये राणा दाम्पत्यांचा फ्लॅट आहे. या फ्लॅटमध्ये त्यांनी अनधिकृत बांधकाम केल्याचा ठपका पालिकेने ठेवला आहे. याप्रकरणी 4 मे रोजी पालिकेचे अधिकारी राणा दाम्पत्यांच्या घरी गेले होते. या घराची पाहणी करून त्यांनी घराला नोटीसही बाजवली होती. फ्लॅटमध्ये बेकायदा बांधकाम झाल्याचं या नोटिशीत म्हटलं होतं. मात्र, राणा दाम्पत्य तुरुंगात असल्याने कारवाई होऊ शकली नव्हती.

तुरुंगातून सुटका

राणा दाम्पत्यांना कोर्टाने सशर्त जामीन मंजूर केला आहे. त्यानंतर रवी राणा तुरुंगातून बाहेर आले. तर आजारी असल्याने नवनीत राणा यांना लिलावती रुग्णालयात दाखल करण्यात आलं होतं. चार दिवसांच्या उपचारानंतर नवनीत राणा यांना काल रुग्णालयातून डिस्चार्ज देण्यात आला. त्यानंतर आज पालिकेचे अधिकारी राणा दाम्पत्यांच्या घरी जाणार असून अनधिकृत बांधकामांची पाहणी करणार आहेत. त्यानंतर अहवाल तयार केला जाईल. राणा दाम्पत्यांचं म्हणणंही ऐकून घेतलं जाईल. त्यानंतर पुढील कार्यवाही केली जाणार आहे, असं सूत्रांनी सांगितलं.

राणा दाम्पत्य आज दिल्लीत

दरम्यान, नवनीत राणा आणि रवी राणा आज दिल्लीत जाणार आहेत. दिल्लीत जाऊन नवनीत राणा या त्यांच्यावर झालेल्या अन्यायाची माहिती देणार आहेत. तसेच शिवसेना नेते संजय राऊत यांचीही तक्रार करणार आहेत. नवनीत राणा या पंतप्रधान नरेंद्र मोदी यांचीही भेट घेण्याची शक्यता वर्तवली जात आहे. त्यामुळे नवनीत राणा यांच्या या दिल्लीवारीकडे सर्वांचं लक्ष लागलं आहे.