भारिपला खिंडार; कारंजा-मानोरा नगरपंचायतीच्या 23 नगरसेवकांचा राष्ट्रवादीत प्रवेश
गेल्या काही दिवसांपासून राष्ट्रवादीत जोरात इन्कमिंग सुरू आहे. आजही भारिप आणि भाजपसह अनेक पक्षाच्या कार्यकर्त्यांनी, पदाधिकाऱ्यांनी राष्ट्रवादीत प्रवेश केला.
मुंबई: गेल्या काही दिवसांपासून राष्ट्रवादीत जोरात इन्कमिंग सुरू आहे. आजही भारिप आणि भाजपसह अनेक पक्षाच्या कार्यकर्त्यांनी, पदाधिकाऱ्यांनी राष्ट्रवादीत प्रवेश केला. राष्ट्रवादीने भारिपला मोठं खिंडार पाडलं आहे. वाशिमच्या कारंजा-मानोरा नगरपंचायतीतील भारिपच्या 23 नगरसेवकांनी आज राष्ट्रवादीत प्रवेश केला. त्यामुळे कारंजा-मनोरा ग्रामपंचायतीत राष्ट्रवादीचं बळ वाढलं आहे.
राष्ट्रवादी काँग्रेसचे प्रदेशाध्यक्ष जयंत पाटील आणि उपमुख्यमंत्री अजित पवार यांच्या प्रमुख उपस्थितीत वाशिम, मावळ आणि ठाणे ग्रामीण भागातील भारिप, भाजपच्या अनेक नेत्यांनी व नगरसेवकांनी आज प्रदेश कार्यालयात राष्ट्रवादीत जाहीर प्रवेश केला. हाजी मोहम्मद युसुफ पुंजानी यांच्यासह हेमेंद्र ठाकरे, जुम्मा पप्पुवाले, फिरोज शेकुवाले, चांदशा कासमशा, अ.एजाज अ. मन्नान, जावेदोद्दीन शेख, इरफान खान इनायतुल्ला खान, जाकीर शेख मोहम्मद इसहाक, सलीम प्यारेवाले, राजू इंगोले, सलीम शेख लालू गारवे, अहमद रशीद अ. कादीर, जाकीर अली अब्बासअली, अ.आरीफ अ.वारिस मौलाना, सै. मुजाहीद सै. अजीज, निसारखान नजीरखान डॉ. धनंजय राठोड, मो. फैजल नागानी, संतोष भोयर, गोपाल खोडके, मो. सोहेल अंसारी, अ. बशीर रहीम, शेषराव राठोड या भारिपमधील 23 नगरसेवक व कार्यकर्त्यांनी राष्ट्रवादीत प्रवेश केला.
ठाणे, भिवंडीतील नेत्यांचा प्रवेश
तर, राष्ट्रवादीचे प्रदेश उपाध्यक्ष प्रमोद हिंदुराव व ठाणे महानगरपालिकेचे गटनेते नजीब मुल्ला यांच्या प्रयत्नाने ठाणे जिल्ह्यातील जिल्हा परिषद सदस्य सुरेश म्हात्रे, गुंदवळी उपसरपंच विलास पाटील, भिवंडी शिवसेना विभाग अध्यक्ष भालचंद्र भोईर, राहनाळ उपसरपंच किरण नाईक यांनी पक्षात प्रवेश केला. यासोबतच मावळ विधानसभा मतदारसंघाचे आमदार सुनिल शेळके यांच्या पुढाकाराने लोणावळ्याचे विद्यमान नगरसेवक भरत हरपुडे, आरोही तळेगावकर, तळेगाव माजी उपनगराध्यक्ष चंद्रभान खळदे, उपसरपंच स्वप्निल काळोखे, उद्योजक भरतशेठ काळोखे यांनीही हाती घड्याळ बांधले.
सदस्य नोंदणीवर भर द्या
यावेळी प्रदेशाध्यक्ष जयंत पाटील यांनी राष्ट्रवादी काँग्रेस पक्ष हे पवारसाहेबांचे कुटुंब आहे. या कुटुंबात आपल्या सर्वांचे स्वागत आहे. आपले प्रश्न इथे नक्कीच सुटतील. कार्यकर्त्यांची गुज राखणारा हा पक्ष आहे. काही दिवसांनी राष्ट्रवादीची सदस्य नोंदणी सुरु होणार आहे. ऑफलाईन आणि ऑनलाईन दोन्ही माध्यमातून पक्षनोंदणीचा कार्यक्रम जोरात राबवा, असे आवाहन पाटील यांनी केले.
पक्ष बळकट करा, अजितदादांचे आवाहन
अजितदादा पवार यांनीही नवीन सदस्यांचे पक्षात स्वागत केले व पक्ष बळकटीसाठी सर्वांना एकजुटीने प्रयत्न करण्याचे आवाहन केले. शरद पवार यांनी स्वाभिमानातून स्थापन केलेल्या पक्षाची विचारधारा सामान्य जनतेपुढे पोहोचविण्यासाठी सर्वांनी प्रयत्न करा, असं सांगतानाच तसेच आगामी स्थानिक स्वराज्य संस्थांच्या निवडणुका नजरेसमोर ठेवून पक्ष संघटना बळकट करण्यासाठी आजचा पक्षप्रवेश प्रभावी ठरेल, असा विश्वासही अजित पवार यांनी व्यक्त केला. यावेळी गृहमंत्री दिलीप वळसेपाटील, ग्रामविकास मंत्री हसन मुश्रीफ, प्रदेश सरचिटणीस शिवाजीराव गर्जे, आमदार सुनील शेळके, आमदार डॉ. किरण लहामटे, युवक कार्याध्यक्ष सूरज चव्हाण, युवक कार्याध्यक्ष रविकांत वर्पे, प्रदेश सरचिटणीस नसिम सिद्दीकी तसेच पक्षाचे इतर स्थानिक पदाधिकारी व कायकर्ते उपस्थित होते.
राष्ट्रवादी काँग्रेस पक्षाचे प्रदेशाध्यक्ष ना. @Jayant_R_Patil पक्षाचे ज्येष्ठ नेते तथा राज्याचे उपमुख्यमंत्री ना. @AjitPawarSpeaks यांच्या प्रमुख उपस्थितीत राष्ट्रवादी भवन, मुंबई येथे वाशिम, मावळ आणि ठाणे ग्रामीण भागातील अनेक मान्यवरांचा पक्षप्रवेश आज संपन्न झाला. @Dwalsepatil pic.twitter.com/OP3lxgfqdO
— NCP (@NCPspeaks) December 2, 2021
संबंधित बातम्या:
param bir singh: अखेर परमबीर सिंग पोलीस खात्यातून निलंबित; राज्य सरकारचा मोठा निर्णय
