Chagan Bhujbal : मी तर सर्व अंगावर परफ्यूम मारून, सेंट मारून जातो, छगन भुजबळ यांचा तानाजी सावंत यांना टोला

राष्ट्रवादी काँग्रेस पक्षाला सोबत घेतल्यामुळे महायुतीचे नुकसान झाले अशा कुरबुरी लोकसभा निवडणुकीनंतर महायुतीतून सुरु झाल्या. राष्ट्रीय स्वयंसेवक संघाने पण यावर तोंडसूख घेतले. त्यानंतर विधानसभेच्या तोंडावर आरोग्यमंत्री तानाजी सावंत यांनी पुन्हा एकदा राष्ट्रवादीवर निशाणा साधला. राष्ट्रवादीच्या मंत्र्यांसोबत बसल्याने उलट्या होतात, असे वक्तव्य त्यांनी केले होते. त्यावर मी तर सर्व अंगावर परफ्यूम मारून, सेंट मारून जातो,असा टोला भुजबळांनी सावंतांना लगावला. विरोधक कोणत्याही गोष्टीवर विरोध करणारच. ते संधी पाहत असतात ना. जरा काही झालं तर सुरू. पण या सर्व गोष्टीवर मुख्यमंत्री आणि उपमुख्यमंत्र्यांनी पडदा टाकला आहे, असे सांगायला ते विसरले नाहीत.

मुख्यमंत्र्‍यांनी त्यांना गोळी दिली

मी तर सर्व अंगावर परफ्यूम मारून, सेंट मारून जातो. एकदम. कशा उलट्या होईल. होत असतील तर गोळीही असते. पूर्वी लहानपणी एसटी स्टँडवर गोळी खाल्ली तर उलटी होणार नाही. मला नाही वाटत असं असेल. मुख्यमंत्र्यांनी तानाजी सावंताना गोळी दिली असेल, असा टोला भुजबळांनी लगावला.

तीनही पक्ष एकत्र

कुणाला पटेल, कुणाला नाही पटणार. पण वास्तव काय. तिघे एकत्र आहेत. ज्यावेळी अशा घडामोडी होतात. इकडचे पक्ष तिकडे, तिकडचे इकडे जातात. तेव्हा एखादा पक्ष तयारी करत असतो. तेव्हा अजितदादा इकडे बसले आणि तिथे त्यांचा आमदार असेल तर त्याची संधी जाते,. त्यामुळे तो एक तर विरोधात बोलतो. किंवा दुसरीकडे जाऊन तो लढतो. त्याला लढायचंच असतं. त्यांना वाटतं आपण पुढच्या वर्षी निवडून येईल. पण पुढच्या वर्षी त्यांचं अलायन्स झालेलं असतं. हे वाढणार. निवडणुकीपर्यंत इकडचे तिकडे, तिकडचे इकडे येणार. आरोप केले जाणार. विरोधकही वाट पाहत असतात. चांगला उमेदवार दिसला तर ते सोबत घेतात, असे भुजबळ म्हणाले.

सिंपथी अमूक तमूक हे लोकसभेत होऊन गेलं. ही राज्याची निवडणूक आहे. लोकसभेच्यावेळच्या गोष्टी,. प्रचाराच्या गोष्टी, विषय वेगळे होते. आता विधानसभेचे विषय वेगळे असतील. नवीन विषय ते काढतील. नवीन खास विरोधकांच्या हाती लागलं नाही. महिना दोन महिना आहेत. ते काही ना काही काढतील.