मुंबईत थंडीने मोडला ९ वर्षाचा रेकॉर्ड, कसे असेल पुढचे काही दिवस हवामान जाणून घ्या

मुंबईकर सध्या थंडीचा आनंद लुटत आहेत. रविवारी रात्रीपासून थंडीचा प्रभाव दिसून येत आहे. मुंबईत तापमान 13.7 अंश सेल्सिअसपर्यंत घसरले आहे. हवामान खात्याच्या आकडेवारीनुसार, गेल्या 9 वर्षांतील डिसेंबरमधील हे सर्वात कमी किमान तापमान नोंदवले गेले आहे. त्यामुळे मुंबईत पुढील आणखी दोन ते तीन दिवस थंडी कायम राहणार असल्याचं हवामाना खात्याने म्हटलंय. यावेळी रात्रीचे तापमान 14 ते 15 अंश सेल्सिअसच्या दरम्यान राहण्याचा अंदाज आहे. गेल्या आठवड्यात ‘फेंगल’ चक्रीवादळामुळे मुंबईच्या तापमानात वाढ झाली होती. ज्यामुळे लोकांना उष्णतेचा सामना करावा लागला. मात्र आता मुंबईकर थंडीचा आनंद लुटत आहेत.

शनिवारपासून मुंबईतील तापमानात कमालीची घट पाहायला मिळत आहे. शनिवारी रात्री किमान तापमान 17 अंश सेल्सिअसवर पोहोचले होते. रविवारी रात्री तापमान 13.7 अंश सेल्सिअसपर्यंत घसरले. याआधी 24 डिसेंबर 2015 रोजी मुंबईचे किमान तापमान 11.4 अंश सेल्सिअस नोंदवले गेले होते. 20 डिसेंबर 1949 रोजी किमान तापमान 10.6 अंश सेल्सिअस होते, जो आजपर्यंतचा विक्रम आहे. मुंबईत रात्री तसेच दिवसाच्या तापमानात किंचित घट पाहायला मिळत आहे.