DMart: महिन्याला तब्बल 28.5 लाख रुपये भाडं; DMart फेम राधाकिशन दमानींच्या कंपनीचा मुंबईत सर्वांत महागडा व्यवहार
राधाकिशन दमानी यांच्या कंपनीने वरळीतील 'थ्री सिक्स्टी वेस्ट'मधील आलिशान फ्लॅट तीन वर्षांसाठी भाड्याने दिलं आहे. मुंबईतील हा अत्यंत महागडा व्यवहार मानला जात आहे. जाणून घ्या सविस्तर माहिती..
मुंबईतील अल्ट्रा-लक्झरी रिअल इस्टेट मार्केट पुन्हा एकदा चर्चेत आलं आहे. ‘डी-मार्ट’चे संस्थापक राधाकिशन दमानी यांच्याशी संबंधित कंपनीने मुंबईतील वरळी इथलं आलिशान अपार्टमेंट लीजवर दिलं आहे. हा व्यवहार मुंबईतील सर्वाधिक महागड्या रेंटल डीलपैकी एक मानला जात आहे. मालमत्तेच्या नोंदणी कागदपत्रांच्या आधारे ही माहिती समोर आली आहे. तब्बल 28.5 लाख रुपये मासिक भाड्याने हे अपार्टमेंट लीजवर दिल्याची माहिती समोर येत आहे. हे अपार्टमेंट वरळीतील ‘थ्री सिक्स्टी वेस्ट’ या लक्झरी प्रोजेक्टमध्ये आहे. डॉ. अॅनी बेझंट रोडवरील या प्रकल्पातील टॉवर बीच्या 19व्या मजल्यावर हे घर आहे. तब्बल 6,831 चौरस फूट क्षेत्रफळ असलेल्या या अपार्टमेंटसोबत चार कार पार्किंगची सुविधाही देण्यात आली आहे.
भाड्याची रक्कम थक्क करणारी
या घराचा लीज व्यवहार 28 सप्टेंबर 2026 रोजी नोंदवण्यात आला. कराराचा कालावधी 36 महिने म्हणजेच तीन वर्षांचा आहे. या काळात सुरुवातीचं मासिक भाडं 28.5 लाख रुपये असेल. म्हणजेच केवळ तीन वर्षांच्या भाड्याची रक्कम 10 कोटी रुपयांपेक्षा जास्त होते. या व्यवहारातील आणखी एक लक्षवेधी बाब म्हणजे तब्बल 1.71 कोटी रुपयांचा सिक्युरिटी डिपॉझिट. या आलिशान अपार्टमेंटसाठी भाडेकरू कंपनीने ही रक्कम जमा केली आहे. अपार्टमेंटचा भाडेकरू म्हणून आयव्हीएल धनसेरी पेट्रोकेम इंडस्ट्रीज प्रायव्हेट लिमिटेड (IVL Dhunseri Petrochem Industries Private Limited) कंपनीचं नाव नोंदवण्यात आलं आहे.
प्रीमियम घरांना मागणी
मुंबईतील सर्वसामान्य घरांच्या तुलनेत ही रक्कम प्रचंड मोठी असली, तरी वरळीतील अल्ट्रा-लक्झरी रिअल इस्टेटमध्ये अशा व्यवहारांचं प्रमाण वाढताना दिसत आहे. विशेषतः कॉर्पोरेट कंपन्या, उद्योगपती आणि अतिश्रीमंत ग्राहकांकडून अशा प्रीमियम घरांना मागणी आहे. ‘थ्री सिक्स्टी वेस्ट’ हा मुंबईतील प्रसिद्ध लक्झरी रेसिडेन्शियल प्रोजेक्ट आहे. वरळीच्या प्राइम लोकेशनमुळे या परिसरातील घरांच्या किमती आणि भाडे दोन्ही मोठ्या प्रमाणात आहेत. याच प्रोजेक्टमध्ये यापूर्वीही कोट्यवधी रुपयांचे व्यवहार झाले आहेत. सप्टेंबर 2026 मध्ये रिलायन्स इंडस्ट्रीजने याच प्रोजेक्टमधील डुप्लेक्ससाठी 75.1 कोटी रुपयांचा व्यवहार केल्याची नोंद आहे.
विशेष म्हणजे, 2026 मध्ये मुंबईच्या लक्झरी रिअल इस्टेटमध्ये वरळी हे प्रमुख केंद्र ठरलं आहे. 5 कोटी रुपयांपेक्षा अधिक किमतीच्या घरांच्या व्यवहारांमध्ये वरळीने आघाडी घेतली असून, लक्झरी रेंटल मार्केटमध्येही या परिसराचा मोठा वाटा आहे.
