कोकणात जाणाऱ्या गणेशभक्तांना यावर्षीही 27 ऑगस्टपासून 11 सप्टेंबरपर्यंत टोलमाफी, पासेस-स्टिकर्स आवश्यक, कुठे मिळणार?

मुंबई- गणेशोत्सवासाठी कोकणात (Kokan)जाणाऱ्या गणेशभक्तांना (Ganesh Devotees)याही वर्षी पथकर(टोल) माफी (toll free)देण्याचा निर्णय मुख्यमंत्री एकनाथ शिंदे यांनी घेतला आहे. या निर्णयाची अंमलबजावणी शनिवार दि. 27 ऑगस्टपासून करण्यात येणार आहे. मुंबई -बेंगलोर राष्ट्रीय महामार्ग, मुंबई-गोवा राष्ट्रीय महामार्ग यावरील आणि इतर सार्वजनिक बांधकाम विभागांच्या रस्त्यांवरील पथकर नाक्यांवर ही सवलत दि. 11 सप्टेंबरपर्यंत असणार आहे. कोकणात गणेशोत्सवासाठी जाणाऱ्या आणि गणेशोत्सवानंतर परत येणाऱ्या भाविकांनाही या टोलमाफीचा लाभ घेता येणार आहे. गेल्या महिन्यात मुख्यमंत्री एकनाथ शिंदे यांच्या अध्यक्षतेखाली झालेल्या बैठकीत गणेशोत्सवासाठी कोकणात जाणाऱ्या गणेशभक्तांना टोलमाफीसह अन्य सोयीा-सुविधा उपलब्ध करुन देण्याचे निर्देश देण्यात आले होते. त्यानुसार आज सार्वजनिक बांधकाम विभागाने पथकर सवलतीचा शासन निर्णय जाहीर करण्यात आला आहे.

कुठल्या कुठल्या रस्त्यांवर टोलमाफी

दिनांक 27 ऑगस्ट ते दिनांक 11 सप्टेंबर या कालावधीत मुंबई – बेंगलोर राष्ट्रीय महामार्ग (राम-48), मुंबई गोवा राष्ट्रीय महामार्ग (रा. म. 66) यावरील व इतर सार्वजनिक बांधकाम विभागाच्या रस्त्यांवरील पथकर नाक्यावर कोकणात जाणाऱ्या गणेशोत्सव भाविकांच्या वाहनांना पथकरातून सवलत देण्यात येणार आहे. शासन निर्णयात हे मार्ग नमूद करण्यात आले आहेत.

टोलमाफीसाठी स्टीकर्स आवश्यक

या टोलमाफी सवलतीसाठी ‘गणेशोत्सव 2022, कोकण दर्शन’ अशा आशयाचे स्टीकर्स स्वरुपाचे पथकर माफी पास आवश्यक असणार आहे. या पासवर वाहनाचा क्रमांक, चालकाचे नाव असा मजकूर लिहून ते स्टीकर्स आवश्यक त्या संख्येनुसार परिवहन विभाग, वाहतूक पोलीस, पोलीस, संबंधीत प्रादेशिक परिवहन विभाग (आर.टी.ओ.) यांच्याकडे उपलब्ध असणार आहेत. या विभागांनी परस्परात समन्वय साधून पोलीस ठाणे, वाहतूक पोलीस चौक्या व आर.टी.ओ. कार्यालयांमध्ये हे पास उपलब्ध करुन द्यावेत. असे आदेशही देण्यात आले आहेत. ज्यांना कोकणात जाण्यासाठी टोलमाफी हवी असेल त्यांना या ठिकाणी जाऊन ते पासेस घ्यावे लागणार आहेत. हेच पास परतीच्या प्रवासाकरीता देखील ग्राह्य धरण्यात येणार आहेत. पोलीस व परिवहन विभागाने गणेशोत्सवाच्या काळात पास सुविधा आणि त्यांच्या उपलब्धतेबाबतची माहिती नागरिकांना द्यावी, अशा सूचनाही सरकारच्या वतीने देण्यात आला आहे.

कोकणात जाणाऱ्या गणेशभक्तांना टोलमाफी

1. पासेस, स्टिकर्स पोलीस आणि परिवहन विभागाकडे उपलब्ध
2.  मुंबई – बेंगलोर राष्ट्रीय महामार्ग, मुंबई गोवा राष्ट्रीय महामार्गावर टोलमाफी
3. पीडीब्ल्यूडीच्या टोलनाक्यांवरही टोलमाफी
4. 27 ऑगस्टपासून ते 11 सप्टेंबरपर्य़ंत टोलमाफी
5. “गणेशोत्सव २०२२, कोकण दर्शन असे स्टिकर्स मिळणार
6. पोलीस ठाणे, वाहतूक पोलीस चौक्या व आर.टी.ओ. कार्यालयांमध्ये स्टिकर्स देणार
7. सदरचाच पास परतीच्या मार्गासाठी वापरता येणार