आधी दंडाला चावली अन् नंतर जे…; मुंबई लोकलच्या फर्स्ट क्लासमध्ये राडा, महिलेने गाठली क्रूरतेची सीमा
कल्याण स्थानकावर लोकलच्या प्रथम श्रेणी डब्यात चढताना झालेल्या वादातून एका अज्ञात महिलेने महिला प्रवाशाच्या हाताचा चावा घेत बोट पिरगळल्याची धक्कादायक घटना घडली आहे. कल्याण रेल्वे पोलीस सीसीटीव्हीच्या आधारे आरोपी महिलेचा शोध घेत आहेत.
मुंबईची लाईफलाईन समजल्या जाणाऱ्या मुंबई लोकलमध्ये सध्या प्रवाशांचा जीव मेटाकुटीला आला आहे. लोकलमध्ये गर्दीच्या वादातून अनेकदा शाब्दिक चकमकी उडतात. मात्र कल्याण रेल्वे स्थानकात एका महिलेने क्रूरतेच्या सर्व सीमा ओलांडल्याचे समोर आले आहे. मुंबई लोकलच्या फर्स्ट क्लासच्या डब्ब्यात चढताना झालेला वाद विकोपाला गेल्याचे पाहायला मिळत आहे. या वादातून एका अज्ञात महिलेने दुसऱ्या महिला प्रवाशाच्या हाताच्या दंडाचा जोरात चावा घेतला. त्यानंतर तिचे बोट पिरगळून तिला जखमी केले.
नेमकी घटना काय?
मिळालेल्या माहितीनुसार, कल्याण पूर्वमधील मलगंगड रोडमध्ये राहणाऱ्या तक्रारदार प्रियंका थोरात (३२) या अंधेरी येथील एका खाजगी कंपनीत नोकरीला आहेत. मंगळवारी सकाळी ८ च्या सुमारास त्या नेहमीप्रमाणे कामावर जाण्यासाठी निघाल्या. त्यांनी कल्याण स्थानकात येऊन फलाट क्रमांक ६ वरुन ट्रेन पकडली. मुंबईच्या दिशेने जाणाऱ्या जलद लोकलच्या प्रथम श्रेणी (First Class) डब्यातून त्या प्रवास करत होत्या.
त्यावेळी डब्यातून उतरणाऱ्या प्रवाशांची आणि चढणाऱ्यांची मोठी गर्दी होती. प्रियंका डब्ब्यात शिरत असताना एका अज्ञात महिलेने त्यांना मज्जाव केला. जागा नाही, आत येऊ नका असे म्हणत त्या महिलेने प्रियंका यांना बाहेर ढकलण्यास सुरुवात केली. प्रियंका यांनी या गोष्टीला विरोध केला. त्यावेळी त्या अज्ञात महिलेने रागाच्या भरात प्रियंका यांच्या हाताच्या दंडाला जोरात चावा घेतला. इतक्यावरच न थांबता, तिने प्रियंका यांचे बोट धरून ते जोरात पिरगळले.
या अचानक झालेल्या हल्ल्यामुळे प्रियंका यांना असह्य वेदना झाल्या. मात्र, कामावर वेळेत पोहोचण्याच्या दबावामुळे आणि गोंधळ टाळण्यासाठी त्यांनी त्याच अवस्थेत प्रवास सुरू ठेवला. संध्याकाळी घरी परतल्यानंतर वेदना वाढल्याने त्यांनी डॉक्टरांकडे धाव घेतली. तपासणीत त्यांच्या बोटाला गंभीर दुखापत झाल्याचे समोर आले. तसेच दंडावर चाव्याच्या जखमा असल्याचे समोर आले.
या धक्कादायक प्रकारानंतर प्रियंका यांनी कल्याण लोहमार्ग पोलीस ठाण्यात (GRP) धाव घेऊन तक्रार नोंदवली. पोलिसांनी अज्ञात महिलेविरोधात गुन्हा दाखल केला आहे. सध्या पोलिसांकडून कल्याणमधील फलाट क्रमांक ६ वरील सीसीटीव्ही फुटेजची तपासणी सुरू केली आहे. यावेळी आरोपी महिलेचे वर्णन आणि ती कोणत्या स्थानकावर उतरली, याचा शोध पोलीस घेत आहेत.
