BREAKING | दोन तासात मोठ्या भेटीगाठी, अखेर शरद पवार माध्यमांशी बोलणार

मुंबई : महाराष्ट्राच्या राजकारणात आज संध्याकाळच्या सुमारास दोन मोठ्या आणि महत्त्वाच्या घडामोडी घडल्या. राष्ट्रवादी काँग्रेसचे अध्यक्ष शरद पवार आज अचानक मुख्यमंत्री एकनाथ शिंदे यांच्या भेटीसाठी त्यांच्या वर्षा या शासकीय निवासस्थानी दाखल झाले. त्यामुळे अनेकांच्या भुवया उंचावल्या. शरद पवार आणि एकनाथ शिंदे यांच्यात जवळपास 40 मिनिटे चर्चा झाली. त्यानंतर शरद पवार हे वर्षा बंगल्याबाहेर दाखल झाले. पण यावेळी त्यांनी कोणतीही प्रतिक्रिया देणं योग्य मानलं नाही. ते प्रसारमाध्यमांना प्रतिक्रिया न देताच तिथून निघून गेले.

शरद पवार आणि मुख्यमंत्री एकनाथ शिंदे यांच्या भेटीनंतर आणखी महत्त्वाच्या घडामोडी घडल्या. उद्योगपती गौतम अदानी शरद पवार यांच्या सिल्व्हर ओक निवासस्थानी दाखल झाले. त्यामुळे या दोन भेटींचं काही कनेक्शन आहे का? असा प्रश्न उपस्थित करण्यात येतोय. अखेर या दोन तासातील मोठ्या भेटींवर शरद पवार भूमिका मांडणार असल्याची माहिती मिळत आहे.

गौतम अदानी यांनी पवारांची आधीही घेतलीय भेट

शरद पवार आणि गौतम अदानी यांच्यात पूर्वीपासून चांगले संबंध आहेत. गौतम अदानी यांनी याआधीदेखील अनेकवेळा शरद पवार यांची भेट घेतलेली आहे. ज्यावेळेला संसदेत गौतम अदानी यांच्यावर आरोप करण्यात आले होते. अदानी यांच्या जीपीएस चौकशीची मागणी करण्यात आली होती. त्यावेळीदेखील अदानी यांनी शरद पवार यांची भेट घेतल्याची माहिती समोर आली होती.

शरद पवार यांनी गौतम अदानी यांच्या जीपीएस चौकशीला विरोध केलेला. पण काँग्रेसने जीपीएस चौकशीची मागणी लावून धरलेली. त्यामुळे मोठ वाद निर्माण झालेला. अखेर काँग्रेस आणि इतर विरोधकांनी आक्रमक पवित्रा घेतल्यानंतर शरद पवार त्यांच्या वक्तव्यापासून बॅकफूटवर आलेले बघायला मिळाले होते.

शरद पवारांनी मुख्यमंत्र्यांची नेमकी भेट का घेतली? एकनाथ शिंदे यांनी दिली प्रतिक्रिया

दरम्यान, एकनाथ शिंदे यांनी ‘टीव्ही 9 मराठी’ला प्रतिक्रिया दिली. यावेळी त्यांनी शरद पवार यांच्या भेटीबद्दल माहिती दिली. “शरद पवार यांची ही सदिच्छा भेट होती. मराठा मंदिर संस्था आहे. या संस्थेचे अध्यक्ष शरद पवार हे आहेत. या संस्थेचा अमृत महोत्सव कार्यक्रम आहे. या कार्यक्रमाचं निमंत्रण देण्यासाठी शरद पवार आले होते”, असं एकनाथ शिंदे यांनी सांगितलं.

“ही सदिच्छा भेट होती. या बैठकीत काही चर्चा झाली नाही. या भेटीत निमंत्रण होतं. याशिवाय काही एक-दोन छोटे विषय होते. यामध्ये शाळांचा विषय होता, कलावंतांचा विषय होता. मुख्य म्हणजे त्यांचं निमंत्रण होतं. अमृत महोत्सवी कार्यक्रम आहे. त्याचे ते अध्यक्ष आहेत. बाकी काही नाही”, असं शरद पवार ‘टीव्ही 9 मराठी’सोबत बोलताना म्हणाले.