अब्दुल सत्तार असचं बोलत राहिला तर, आम्ही आमची संस्कृती बाजूला ठेऊ, अमोल मिटकरींचा इशारा…

मुंबईः राष्ट्रवादीच्या खासदार सुप्रिया सुळे यांच्याबद्दल आक्षेपार्ह वक्तव्य करणाऱ्या अब्दुल सत्तार यांच्यावर आमदार अमोल मिटकरी यांनी जोरदार हल्लाबोल केला. यावेळी अमोल मिटकरी म्हणाले की, सुप्रिया सुळे यांच्याबद्दल अब्दुल सत्तारांनी केलेले हे वक्तव्य बेजबाबदारपणाचे आहे. महाराष्ट्रासाठी हे दुर्दैवी आहे. संसदरत्न खासदार सुप्रियाताई सुळे यांच्याबद्दल जे अपशब्द अब्दुल सत्तार नावाच्या कृषी मंत्र्यांनी वापरले आहेत. त्यावरून अब्दुल सत्तार हा किती विकृत माणूस आहे हे लक्षात येईल.

कोणत्याही आई बहिणीचा सन्मान करणे ही महाराष्ट्राची संस्कृती आहे. छत्रपती शिवाजी महाराजांची शिकवण आहे, मात्र हिंदुत्वाच्या नावाचे राजकारण करून अशा पद्धतीची वक्तव्य करुन अब्दुल सत्तार जर असं वागत असेल तर भविष्यात त्याचे त्यांना उत्तर मिळेल असा इशाराही त्यांनी त्यांना दिला आहे.

त्याबरोबरच त्यांनी सुप्रिया सुळे यांच्याबद्दल जे त्यांनी वक्तव्य केले आहे ते चोवीस तासाच्या आत परत यावे नाही तर, आमच्या राष्ट्रवादी काँग्रेस पक्षाची संस्कृती कोणाला वाईट बोलणे ही नाही मात्र अशावेळी आम्ही आमच्या पक्षाची संस्कृतीसुद्धा विसरून जाऊ, पक्ष बाजूला ठेवू आणि अब्दुल सत्तार असाच बोलले तर त्याची जीभ हासडल्याशिवाय आम्ही राहणार नाही असा इशाराही त्यांनी यावेळी दिला आहे.

अब्दुल सत्तार यांनी सु्प्रिया सुळे यांच्याबद्दल आक्षेपार्ह विधान केल्यानंतर राज्यातील राजकारण आता ढवळून निघाले आहे. या वक्तव्यामुळे राज्यातील अनेक ठिकाणी राष्ट्रवादी काँग्रेसकडून जोरदार निदर्शने केली जात आहेत. औरंगाबादमध्ये अब्दुल सत्तारांच्या पुतळ्याला जोडे मारो आंदोलन केले जात आहे.