नार्वेकर, निवडणूक आयोग खरे बौद्धिक नक्षलवादी; संजय राऊत यांचा घणाघात

शिवसेनेवरील कालच्या सुनावणीत ज्येष्ठ वकील कपिल सिब्बल यांनी विधानसभेचे अध्यक्ष राहुल नार्वेकर यांच्या अक्षरश: चिंधड्या उडवल्या. त्यांचं वस्त्रहरण केलं. संवैधानिक पदावर बसलेला व्यक्ती किती बोगस आहे, हे दाखवून दिलं. त्यामुळे मोदींच्या भाषेत हेच खरे बौद्धिक नक्षलवादी आहेत. खरे बौद्धिक नक्षलवादी हे विधानसभेचे अध्यक्ष आणि निवडणूक आयोग आहे. यांनी संविधान गाडलं तेच बौद्धिक नक्षलवादी आहेत, असा घणाघाती हल्ला ठाकरे गटाचे नेते संजय राऊत यांनी केला. मीडियाशी संवाद साधत असताना राऊत यांनी हा हल्ला चढवला.

सर्वोच्च न्यायालयात काल शिवसेना पक्षावर सुनावणी होती. या सुनावणीवेळी ठाकरे गटाचे वकील कपिल सिब्बल यांनी जोरदार युक्तिवाद केला. कालच्या सुनावणीत सिब्बल यांनी विधानसभा अध्यक्षांच्या कार्यपद्धतीवरच बोट ठेवलं. संजय राऊत यांनी सिब्बल यांच्या युक्तिवादाचं कौतुक केलं आहे. कालचा युक्तिवाद अत्यंत उत्तम होता, असं राऊत म्हणाले. यावेळी त्यांनी विधानसभा अध्यक्ष आणि निवडणूक आयोगावर जोरदार हल्लाही चढवला. तसेच विधानसभा अध्यक्ष आणि निवडणूक आयोगाला बौद्धिक नक्षलवाद्याची उपमाही दिली.

नार्वेकरांचं वस्त्रहरण, चिंधड्या उडाल्या

शिवसेना सोडून 13 जण सूरतला गेले. त्या दिवशीच आम्ही त्यांच्यावर अपात्रतेची कारवाई करण्याचा आग्रह होता. तो निकाल वेळेत लागला असता तर पुढचं काहीच घडलं नसतं. त्या निकालाची वाट न बघता विधीमंडळ पक्षातील फुटीवर शिक्कामोर्तब करण्यात आलं आणि पक्ष चिन्ह मिंधे गटाला विकलं. मोठा व्यवहार झाला. काल नार्वेकरांचं वस्त्रहरण केलं. चिंधड्या उडवल्या. सिब्बल यांनी विधानसभा अध्यक्षांना निर्वस्त्र केलं. संवैधानिक पदावर बसलेला व्यक्ती किती बोगस आहे हे दाखवून दिलं. मोंदीच्या भाषेत बौद्धिक नक्षलवादी आहेत. खरे बौद्धिक नक्षलवादी निवडणूक आयोग आहे. विधानसभेचे अध्यक्ष आहेत. ज्यांनी संविधान गाडलं ते बौद्धिक नक्षलवादी आहेत, असं राऊत म्हणाले.

बौद्धिक नक्षलवादी कोण?

सिब्बल यांनी सांगितलं, तो निकाल आधी द्या. आपोआप पुढची गाडी सुरळीत होते. सिब्बल यांनी काल उत्तम युक्तिवाद केला. कायद्याला धरून झालेला युक्तिवाद आहे. कालच्या युक्तिवादाने बौद्धिक नक्षलवादी कोण? हे स्पष्ट झालं. विधिमंडळातील फूट ही पक्षातील फूट माणून पक्ष विकला ते विधानसभा अध्यक्ष बौद्धिक नक्षवलवादी आहेत. कोणत्याही नियमाचं पालन न करता निवडणूक आयोगाने या विक्रीत भाग घेतला ते नक्षलवादी आहेत, असा हल्लाच त्यांनी चढवला.

यावेळी त्यांनी राहुल नार्वेकर यांच्या विधानाचाही समाचार घेतला. नार्वेकर म्हणजे काय डॉ. बाबासाहेब आंबेडकर यांचे वारसदार आहेत का? नार्वेकर म्हणतात म्हणजे काय म्हणतात? नार्वेकरांचं ट्विटर हँडल बघा. विधानसभेचा अध्यक्ष पक्षपाती असू नये, कोणत्या पक्षाचा असू नये. पण नार्वेकराने भाजपची नवी कार्यकारिणी ट्विटरवर टाकून त्यांचं अभिनंदन केलं आहे. त्यांचं काय सांगता? तुम्ही पक्षपाती आहात. तुम्ही हा निर्णय घेतला. आर्थिक आणि राजकीय दबावाखाली हा निकाल दिला. त्याबद्दल मला नोटीस आली तरी स्वीकारायाला तयार आहे, असं ते म्हणाले.