आरोग्यमंत्र्यांच्या दालनातच शिवसेना आमदाराला चक्कर

उस्मानाबाद : उस्मानाबादमधील शिवसेना आमदार कैलास पाटील यांना आरोग्यमंत्री राजेश टोपे यांच्या दालनातच चक्कर आली. जनतेच्या कामासाठी मंत्रालयातील विविध दालनात जाऊन धावपळ केल्याने कैलास पाटील यांची तब्येत बिघडली (Shivsena MLA Health Deteriorated) होती. सुदैवाने पाटील यांच्या प्रकृतीत आता सुधारणा आहे.

मतदारसंघातील कामांचा पाठपुरावा करण्यासाठी कळंबचे आमदार कैलास पाटील यांना एका कार्यालयातून दुसऱ्या कार्यालयात जावं लागलं. अधिकारी आणि संबंधित विभागांच्या प्रमुखांशी चर्चा करताना सकाळचा नाश्ता आणि दुपारचं जेवण करण्यासही राहून गेलं. त्यामुळे कैलास पाटलांना उपवास तर घडलाच शिवाय थकवाही जाणवत होता.

दुपारच्या सुमारास आरोग्यमंत्री राजेश टोपे यांच्या दालनात बसलेलं असतानाच कैलास पाटील यांना अचानक अस्वस्थ वाटू लागलं. पाटलांना दरदरुन घाम फुटल्याचं पाहून आरोग्यमंत्र्यांच्या दालनात एकच गोंधळ उडाला. त्यानंतर त्यांना तात्काळ बैठकीच्या रुममध्ये नेण्यात आलं आणि सरकारी डॉक्टरांना बोलवण्यात आलं.

शारीरिक आणि मानसिक तणावामुळे कैलास पाटील यांना थकवा आल्याची माहिती आहे. कैलास पाटील यांची तब्येत ठीक असून वैद्यकीय चाचणीनंतर ते मंत्रालयातील विकास कामासाठी पुन्हा सक्रियही झाले. त्यानंतर ते आपला मतदारसंघ कळंबला रवाना होणार असल्याचीही माहिती (Shivsena MLA Health Deteriorated) आहे.