सात तास ‘वेट’ अखेर शिवतारे आणि मुख्यमंत्र्यांची भेट, नेमकी काय चर्चा झाली?

मुंबई : आगामी लोकसभा निवडणुकीमध्ये बारामती मतदारसंघाकडे अवघ्या राज्याचं लक्ष लागलेलं आहे. नणंद आणि भावजय यांच्यात ही निवडणुक होणार आहे. मात्र दोन्ही पवारांना पराभूत करण्यासाठी शिंदे गटाचे विजय शिवतारे यांनीही दंड थोपटले आहेत. महायुतीमध्ये असुनही त्यांनी उघडपणे पवार यांना आव्हान देणार असल्याचं सांगितलं. याच पार्श्वभूमीवर शिवतारे मुख्यमंत्री एकनाथ शिंदे यांच्या भेटीसाठी मुंबईला आले होते. मात्र त्यांना तब्बल सात तास वाट पाहावी लागली पण त्यांनी भेट घेतलीच. या भेटीमध्ये काय चर्चा झाली याबाबत विजय शिवतारे यांनी माध्यमांशी बोलताना सांगितलं आहे.

विजय शिवतारे काय  म्हणाले?

मुख्यमंत्र्यांसोबत सकारात्मक चर्चा झाली. माझ्यासह जिल्हा परिषद सदस्य, तालुका पंचायत सदस्य, नगरसेवक, मोठे पदाधिकारी, जिल्हा आणि तालुका प्रमुखांसह 150 पदाधिकारी आले. आम्ही सर्वांना मिळून एकनाथ शिंदे यांना समजावलं, हा त्रास आमच्याकडे आहे. माझी भावना काय आहे ती आम्ही मुख्यमंत्र्यांना कळवली. याबाबत दोन दिवसानंतर परत एकदा मीटिंग होईल. दोन दिवस शांत राहणार आहोत कारण त्यांना काय कोणाशी काही चर्चा करायची असेल पण दोन दिवसानंतर परत एकदा मुख्यमंत्र्यांशी मोजक्याच लोकांसह मुख्यमंत्र्यांना भेटणार असल्याचं विजय शिवतारे यांनी सांगितलं.

विजय शिवतारे आणि अजित पवार यांच्यातील संघर्ष राज्याला माहित आहे. विधानसभा निवडणुक 2019 मध्ये अजित पवारांनी शिवतारेंना निवडणुकीअगोदर कसा निवडून येतो ते पाहतो, असं आव्हान दिलं होतं. या निवडणुकीमध्ये शिवतारे यांना पराभवाचा सामना करावा लागला होता. मात्र आता राजकीय समीकरण बदलली आहेत.

विजय शिवतारे हे शिंदे गटात आहेत, तर महायुती असल्याने आता अजित पवार आणि विजय शिवतारे यांना एकत्र यावं लागलं. परंतु निवडणुकीमध्ये आपण लढणार असल्याचं शिवतारे म्हणाले होते. इतकंच नाहीतर त्यांनी तिकीट मिळालं नाहीतर आपण अपक्ष लढणार आहोत, असं म्हटलंय. त्यामुळे आता दोन दिवसांनी मुख्यमंत्री एकनाथ शिंदे काय तोडगा काढतात हे पाहणं महत्त्वाचं ठरणार आहे.