Dharashiv News: एकनाथ शिंदेंचा खास शिलेदार अडचणीत! कारखान्यासमोर मृतदेहासह आंदोलन, कामकाज बंद पाडलं
मृत कुटुंबियांच्या नातेवाईकांसह ऊसतोड कामगारांनी आक्रमक भूमिका घेतली असून गेल्या चार तासांपासून मृतदेहासह तीव्र आंदोलन सुरु केले आहे. कारखान्याच्या गव्हाणीमध्ये बसून हे आंदोलन सुरु असून फॅक्टरीचे कामकाजही कामकाजही बंद करण्यात आले आहे.
Dharashiv Sugar Factory Worker Protest: धाराशिवमधून एक धक्कादायक बातमी समोर आली आहे. शिवसेना शिंदे गटाचे नेते आमदार तानाजी सावंत यांच्या भैरवनाथ शुगर कारखान्यासमोर ऊस तोड मजुरांनी आंदोलन सुरु केले असून परिसरात तणावाचे वातावरण पाहायला मिळत आहे. ट्रॅक्टर चालक महादेव मुंडे यांच्या मृत्यूप्रकरणी नातेवाईक आणि ऊसतोड कामगारांनी कारखाना व्यवस्थापनाविरोधात आंदोलन सुरू केलं आहे. नेमकं काय घडलं? जाणून घ्या सविस्तर…
ऊसतोड कामगारांचे मृतदेहासह आंदोलन
समोर आलेल्या माहितीनुसार, धाराशिव जिल्ह्यातील ढोकी येथील आमदार तानाजी सावंत यांच्या भैरवनाथ शुगर कारखान्यात सध्या तणावाचं वातावरण पाहायला मिळत आहे. महादेव मुंडे या ट्रॅक्टर चालकाच्या मृत्यूवरुन ऊसतोड कामगारांनी आक्रमक भूमिका घेतली आहे. महादेव मुंडे यांचा ढोकी-कळंब रोडवर अपघात झाला होता. अपघातानंतर त्यांना उपचारासाठी सोलापूर येथे दाखल करण्यात आलं होतं. मात्र, उपचारादरम्यान त्यांचा मृत्यू झाला.
मात्र अपघातानंतर कारखाना व्यवस्थापनाने वेळीच लक्ष दिलं असतं, तर महादेव मुंडे यांचे प्राण वाचले असते, असा आरोप मृताच्या नातेवाईकांकडून करण्यात येत आहे. या प्रकरणात कारखाना व्यवस्थापनाच्या दुर्लक्षाची चौकशी करावी आणि महादेव मुंडे यांच्या कुटुंबाला न्याय मिळवून द्यावा, अशी मागणी आंदोलकांकडून करण्यात येत आहे. मृत कुटुंबियांच्या नातेवाईकांसह ऊसतोड कामगारांनी आक्रमक भूमिका घेतली असून गेल्या चार तासांपासून मृतदेहासह तीव्र आंदोलन सुरु केले आहे. कारखान्याच्या गव्हाणीमध्ये बसून हे आंदोलन सुरु असून फॅक्टरीचे कामकाजही कामकाजही बंद करण्यात आले आहे.
आमदार तानाजी सावंत यांच्या अडचणी वाढणार?
मृतदेहासह सुरू असलेल्या या आंदोलनामुळे कारखाना परिसरात तणावाचं वातावरण निर्माण झालं आहे. गेल्या चार तासांपासून कारखान्याचं कामकाज ठप्प असून, आंदोलक आपल्या मागण्यांवर ठाम आहेत. आता कारखाना व्यवस्थापन आणि आंदोलकांमध्ये काय तोडगा निघतो, याकडे सर्वांचं लक्ष लागलं आहे. दरम्यान, या संपूर्ण प्रकरणामुळे एकनाथ शिंदेंच्या शिवसेनेचे आमदार, माजी मंत्री तानाजी सावंत यांच्या अडचणी वाढण्याची चिन्हे दिसत आहेत.
