नागपुरात 31 नवीन कोव्हिड रुग्णालये होणार, मनपाचे आदेश, रुग्णालयांकडून मागवला अहवाल

नागपूर : कोरोना रुग्णांची वाढती संख्या लक्षात घेता नागपुरात पुन्हा नव्याने 31 नियमित रुग्णालये आता डेडिकेटेड कोव्हिड रुग्णालयात परीवर्तीत होणार आहेत (Nagpur Corona Hospital). यासंदर्भातील एक आदेश नागपूर महानगरपालिकेने निर्गमित केला आहे. पालिकेने 24 तासात संबंधित रुग्णालयांकडून सदर रुग्णालय कोव्हिड रुग्ण दाखल करून सज्ज असल्याबाबतचा अहवाल मागवला आहे (Nagpur Corona Hospital).

नागपुरात आता कोव्हिड (डीसीएच) रुग्णालयांची संख्या एकुण 62 झाली आहे. पालिकेने दिलेल्या आदेशात नमूद केल्यानुसार, 24 तासात रुग्णालयांकडून अहवाल प्राप्त झाल्यानंतर पुढील 48 तासात कोव्हिड-19 पॉझिटिव्ह रुग्ण संबंधित रुग्णालयांना भरती करता येणार आहे.

जे रुग्ण दाखल होतील त्यांच्यावर शासनाच्या मार्गदर्शक सूचनेनुसार उपचार करण्यात यावा, असेही आदेशात नमूद केले आहे. दाखल करण्यात आलेल्या रुग्णांचा रिअल टाईम अहवाल मनपाच्या पोर्टलवर नियमित अद्यावत करणे अनिवार्य राहील.

दरम्यान, नागपुरात कोरोनाचा वाढता प्रभाव बघता मास्क न घालणाऱ्यांवरही महापालिकेची जोरदार कारवाई सुरु आहे. उपद्रव शोध पथकांकडून कारवाई सुरु आहे. दोन दिवसात 467 जणांवर कारवाई करण्यात आली आहे. तर 93 हजार 400 रुपयांचा दंड आकारला आहे. नागपुरातील प्रत्यक झोनमध्ये कारवाई करण्यात आली आहे.

नागपुरात कोरोना रुग्णांची वाढती संख्या चिंतेचा विषय बनला आहे. आठवड्या भरात 11 हजारावर रुग्णांची नोंद झाली आहे. मागील आठवड्यात 11 हजार 145 रुग्णांची नोंद तर 282 रुग्णांचा मृत्यू झाला आहे. गेल्या 24 तासात नागपुरात 1741 रुग्णांनाची नोंद झाली तर 45 रुग्णांचा मृत्यू झाला आहे. नागपुरात एकूण रुग्ण संख्या 38 हजार 139 झाली, तर एकूण मृत्यूची संख्या 1261 झाली आहे.

संबंधित बातम्या :

Nagpur Corona : नागपूरमध्ये रुग्ण संख्येत झपाट्याने वाढ, 65 पेक्षा अधिक डॉक्टरांना कोरोनाची लागण

पांडुरंग रायकरांच्या मृत्यूचा अहवाल सोमवारी येईल, दोषींवर कडक कारवाई करणार : अजित पवार