NEET चा गोंधळ संपता संपेना! नागपूरच्या विद्यार्थ्याला परीक्षेसाठी थेट अबुधाबीतील केंद्र… NTA च्या कारभारावर प्रश्नचिन्ह

NEET Nagpur Students assigned Abu Dhabi Exam Center: प्रश्नपत्रिका फुटीनंतरही नॅशनल टेस्टिंग एजन्सीचा (NTA) कारभार सुधारला नसल्याचे समोर येत आहे. नीट पेपर लीकवरून वातावरण तापले. पालक, विद्यार्थ्यांनी परीक्षा एजन्सीविरोधात संताप व्यक्त केला. त्यानंतर 21 जून रोजी आता री-नीट परीक्षा होत आहे. पण गोंधल थांबलेला नाही. एजन्सीने नागपूरमधील अब्दुल्लाह नावाच्या एका विद्यार्थ्याला 21 जून रोजी होणाऱ्या NEET पुनर्परिक्षेसाठी थेट संयुक्त अरब अमिरात या देशातील अबुधाबी येथील परीक्षा केंद्र दिले आहे. NTA परदेशातील विद्यार्थ्यांसाठी परदेशी केंद्र देते. पण देशातील विद्यार्थ्याला थेट परदेशातील परीक्षा केंद्र दिल्याने पालक आणि विद्यार्थ्याची भांबेरी उडाली आहे.

22 लाख विद्यार्थी नीट देणार

देशभरात उद्या, रविवारी 22 लाख विद्यार्थी नीटची फेर परीक्षा देणार आहे. यापूर्वी पेपरफुटीमुळे त्यावेळी घेतलेली परीक्षा रद्द करण्याचा निर्णय घेण्यात आला होता. तर नगापूरमधील अब्दुल्ला मोहम्मद या विद्यार्थ्याला जे परीक्षा प्रवेश पत्र देण्यात आले. त्यात संयुक्त अरब अमिरातमधील अबुधाबी हे परीक्षा केंद्र देण्यात आले. त्यामुळे राष्ट्रीय परीक्षा एजन्सीच्या निष्काळजीपणावर संताप व्यक्त केल्या जात आहे. आता उद्या परीक्षा असताना आणि पासपोर्ट नसताना अबुधाबीच्या परीक्षा केंद्रावर कसं जाणार असा प्रश्न पालक आणि विद्यार्थ्याला पडला आहे.

विद्यार्थी-पालकांची NTA कडे तक्रार

अब्दुल्ला मोहम्मद याने नागपूर, वर्धा आणि भंडारा असे परीक्षा केंद्र म्हणून पर्याय दिला होता. पण एनटीएने त्याला थेट युएईतील अबुधाबी हे परीक्षा केंद्र दिले होते. या गोंधळानंतर विद्यार्थ्याने एनटीएच्या हेल्पलाईनवर तक्रार केली. परीक्षा केंद्र बदलून देण्याची मागणी केली. एनटीएच्या अधिकाराने या तक्रारीची दखल घेतली आहे. त्यांनी चूक मान्य केली आहे. तर या विद्यार्थ्याला आता नागपूरमधील परीक्षा केंद्र मिळण्याची शक्यता वर्तवली जात आहे. पण ऐन परीक्षा तोंडावर अशी चूक केल्याने एनटीएवर संताप व्यक्त करण्यात येत आहे. जर आता लवकर परीक्षा केंद्राबाबत बदल झाला नाहीतर या विद्यार्थ्याला परीक्षेपासून वंचित राहावे लागू शकते. तर परीक्षा तोंडावर असताना परीक्षा केंद्रावरून गोंधळ घालून या विद्यार्थ्यांला एनटीएने नाहक मनस्ताप दिल्याचे समोर येत आहे.

नीटसाठी 2 लाख कर्मचारी तैनात

उद्या होणाऱ्या नीटच्या पुनर्परीक्षेसाठी अभूतपूर्व तयारी करण्यात आली आहे. आज देशभरात सकाळी 9 ते रात्री 8 वाजेपर्यंत मॉक ड्रिल होणार आहे. या परीक्षेसाठी देशभरात 22.79 लाख विद्यार्थी परीक्षा देणार आहेत. तर त्यासाठी 2 लाख कर्मचारी तैनात असतील. साडे 5 हजाराहून अधिक केंद्रांवर नीटची पुनर्परीक्षा होणार आहे.