लहान मुलांना सोडून पोटापाण्यासाठी नागपुरात आले, नियतीने घेतला दाम्पत्याचा असा बळी

नागपूर : नागपूर हे उपराजधानीचे शहर. आजूबाजूच्या गावातील लोकं येथे रोजगारासाठी येतात. बालाघाट, शिवणी, भंडारा, गोंदिया या जिल्ह्यातून काही लोकं कोणत्या ना कोणत्या कामानिमित्त नागपूर गाठतात. नागपूर हे जवळ असलेले रोजगाराचे हमखास शहर. पण, आता नागपूर शहराची लोकसंख्या वाढत आहे. त्यामुळे बाहेरून आलेल्या लोकांची तात्पुरती व्यवस्था केली जाते. पण, वादळ वाऱ्यात अशा झोपड्या निस्तनाबूत होतात. त्यात नुकसान होण्याची शक्यता मोठी असते. गुरुवारी आलेल्या वादळात टिनाचे शेड पडून दाम्पत्याचा मृत्यू झाल्याची घटना समोर आली.

टिनाचे शेड पडून दोघांचा मृत्यू

छत्तीसगड येथील गौरीलाल पटेल (वय ३२) आणि त्यांची पत्नी रामला गौरीलाल पटेल (वय ३१) हे दोघेही नागपुरात मजुरीच्या कामासाठी आले. ते बलोदा बाजार येथील सोलदा गावचे रहिवासी. मनीषनगर येथील गुरुछाया सोसायटीतील सांझविला येथे ते मजुरीचे काम करायचे. राहण्यासाठी ठेकेदाराने त्यांना टिनाच्या झोपडीची व्यवस्था करून दिली होती.

टिनाचे शेड डोक्यावर पडल्याने मृत्यू

टिनाच्या झोपडीतील टीन वादळवाऱ्यात उडाले. त्यानंतर ते झोपडीत पडले. यावेळी दोघेही पती-पत्नी यांच्या डोक्यावर ते टीन पडले. यांत ते गंभीर जखमी झाले. त्यांनी एम्स रुग्णालयात दाखल करण्यात आले. वैद्यकीय अधिकाऱ्यांनी त्यांना मृत घोषित केले.

दोन्ही मुले झाली पोरकी

पटेल दाम्पत्याने काम करून घरी मुलांच्या पालनपोषणासाठी पैसे पाठवण्याचे ठरवले होते. गावातच दोन्ही मुलांना ठेवले होते. एक तीन वर्षांचा तर दुसरा पाच वर्षांचा अशा लहान मुलांना गावी ठेवून ते पोट भरण्यासाठी नागपूरला आले होते.

पण, निसर्गाच्या तांडवात होत्याचे नव्हते झाले. या दोघांचाही मृत्यू झाला. त्यामुळे दोन्ही लहान मुले पोरकी झालीत. पटेल यांच्या कुटुंबीयांचे आता पालनपोषण कोण करणार, असा प्रश्न निर्माण झाला आहे.

घटनेनंतर बेलतरोडी पोलीस ठाण्याचे निरीक्षक अनिल मेश्राम घटनास्थळी पोहचले. पोलिसांनी अकस्मात मृत्यूची नोंद केली. या भागात बांधकाम सुरू आहेत. मजूर टिनाच्या झोपड्यांमध्ये राहतात. गुरुवारी आलेल्या वादळी पावसाने अनेकांच्या घराचे छत उडाले.