स्पा सेंटरच्या नावाखाली नको ते सुरु केले, ठाणे आणि पुण्यातील तरुणींना जबरदस्ती… मोठे जाळे उघड

नांदेड येथील एका स्पा सेंटरच्या नावाखाली चालणाऱ्या देहव्यापार व्यवसायाच्या जाळ्यातून सात महिलांची सुटका करण्यात आली आहे. शहरातील फुले मार्केट परिसरातील वेलनेस स्पा सेंटर हे केवळ मसाज केंद्र असल्याचे भासवून अवैध व्यवसायासाठी वापरले जात होते. स्थानिक गुन्हे शाखेने (एलसीबी) या प्रकरणात मोठी कारवाई केली असून, परराज्यातील तरुणींचा वापर करून चालवलेला हा अवैध व्यवसाय उघडकीस आला आहे.

पोलिसांनी पाठवले डमी ग्राहक

एलसीबीच्या पथकाने आधी डमी ग्राहक पाठवून खातरजमा केली. डमी ग्राहकाने इशारा देताच पोलिसांनी त्वरित छापा टाकला. या कारवाईत नेपाळ, नागालँड, नवी दिल्ली, ठाणे आणि पुणे येथील सात महिलांची सुटका करण्यात आली. या महिलांना स्पा सेंटरमध्ये मसाजच्या नावाखाली ठेवून देहव्यापारासाठी भाग पाडले जात असल्याचे समोर आले आहे.

पावणे दोन लाख रुपयांचा मुद्देमालही जप्त

या छाप्यातून तीन पुरुषांना अटक करण्यात आली. आसाम येथील हीफझुर रहेमान, रहाज उद्दिन आणि याहीया अहेमद यांना पोलिसांनी ताब्यात घेतले. तसेच पावणे दोन लाख रुपयांचा मुद्देमालही जप्त करण्यात आला. मात्र स्पा सेंटरचा मालक संतोष बघे अद्याप फरार आहे. पोलिसांनी त्याच्या शोधासाठी मोहीम सुरू केली आहे. ही कारवाई शिवाजीनगर पोलीस ठाण्यात नोंदवण्यात आली आहे. अनैतिक मानवी व्यापार प्रतिबंध अधिनियमासह विविध कलमांखाली गुन्हा दाखल करण्यात आला आहे. पोलिसांच्या मते, अशा प्रकारच्या केंद्रांमधून परराज्यातील महिलांना आमिष दाखवून आणले जाते आणि नंतर त्यांना अवैध व्यवसायात गुंतवले जाते.

सुटका झालेल्या महिलांची चौकशी 

या घटनेने शहरातील स्पा आणि मसाज केंद्रांच्या नावाखाली चालणाऱ्या अवैध व्यवसायांकडे पुन्हा एकदा लक्ष वेधले आहे. पोलिसांनी नागरिकांना सतर्क राहण्याचे आवाहन केले आहे. अशा संशयास्पद केंद्रांची माहिती मिळाल्यास तात्काळ पोलिसांना कळवावे, असे आवाहन करण्यात आले आहे. सुटका झालेल्या महिलांची चौकशी सुरू असून, पुढील कायदेशीर कारवाई वेगाने केली जाईल, असे अधिकाऱ्यांनी स्पष्ट केले आहे.