नाशिक महापालिका निवडणूकः 3 दिवसांत कच्ची प्रभाग रचना होणार अंतिम
नाशिक महापालिका निवडणुकांचे बिगुल वाजले असून, येणाऱ्या 3 दिवसांत कच्ची प्रभाग रचना अंतिम होणार आहे. याबाबतचे आदेश महापालिका आयुक्तांनी अधिकाऱ्यांना दिल्याने अधिकाऱ्यांची धावपळ वाढली आहे.
नाशिकः नाशिक महापालिका निवडणुकांचे बिगुल वाजले असून, येणाऱ्या 3 दिवसांत कच्ची प्रभाग रचना अंतिम होणार आहे. याबाबतचे आदेश महापालिका आयुक्तांनी अधिकाऱ्यांना दिल्याने अधिकाऱ्यांची धावपळ वाढली आहे. यात प्रामुख्याने 33 हजार मतदारांचा 1 प्रभाग होण्याची शक्यता आहे, तर 22 टक्के लोकसंख्या ही अनुसूचित जाती जमातीची असल्याने प्रभाग रचनेच्या फेरबदलाचा अंतिम निर्णय महापालिका आयुक्त घेणार आहेत. त्यानंतरच ही प्रभाग रचना निवडणूक आयोगाकडे सोपविली जाणार आहे.
नाशिकमध्ये सुरुवातीला म्हणजे 26 ऑगस्ट रोजी निवडणूक आयोगाने एक सदस्यीय प्रभागरचनेसाठी कच्चा आराखड्याचे काम करण्याचे आदेश दिले होते. मात्र, राज्य मंत्रिमंडळाच्या बैठकीत तीन सदस्यीय प्रभागरचना झाली. त्यानुसार या कामात पुन्हा बदल झाला. मात्र, आता नगरसेवकांची संख्याही 122 वरून 133 वर नेण्यात आली. त्यामुळे आता पुन्हा या कामात बदल करावा लागणार आहे. पूर्वीच्या नियोजनानुसार साधरणतः 36 हजार लोकसंख्येचा एक प्रभाग होता. मात्र, नगरसेवकांची संख्या वाढल्यानंतर आता एका प्रभागाची लोकसंख्या 3 3 हजारांच्या घरात असेल. त्यामुळे कच्च्या प्रभारचनेचे काम पुन्हा करावे लागत आहे. नाशिक, ठाणे, उल्हासनगर, पुणे, पिंपरी-चिंचवड, सोलापूर, अमरावती, अकोला, नागपूर महापालिकेसाठी 30 नोव्हेंबरची मुदत होती. नवी मुंबई, औरंगाबाद, वसई-विरार, कल्याण-डोंबिवली, कोल्हापूरसाठी 18 नोव्हेंबर, तर लातूर, परभणी, चंद्रपूर, भिवंडी-निजामपूर, मालेगावसाठी 25 डिसेंबरची मुदत आहे. पनवेल, मीरा-भाईंदर, नांदेड-वाघाळा महापालिकेसाठी हे काम 15 फेब्रुवारीपर्यंत करावे लागेल.
आयुक्तांची करडी नजर
प्रारूप प्रभाग रचनेच्या सध्या सुरू असलेल्या कामावर महापालिका आयुक्त कैलास जाधव यांनी करडी नजर ठेवली आहे. प्रभाग रचना करताना कोणाला झुकते माप दिल्याचे आढळल्यास संबंधित निवडणूक अधिकारी व कर्मचाऱ्यांवर बडतर्फीची कारवाई करू, असा इशारा त्यांनी दिला आहे. शिवाय कच्ची प्रभारचना ज्या रूममध्ये सुरू आहे, तिथे सुरक्षा वाढवली गेली आहे. या रूममध्ये मोबाईल, पेन, पेन्सील, कागद आत नेण्यास आणि बाहेर आणण्यास निर्बंध घालण्यात आले आहेत.
तिकीट मिळण्याआधीच प्रचार
नाशिक महापालिका निवडणुकीची अजून प्रारूप प्रभाग रचनेचा कच्चा आराखडा तयार करणे सुरू आहे. त्यात नगरसेवकांचे तिकीट कुणाला मिळणार, हे ही संबंधित पक्षांनी जाहीर केलेल नाही. मात्र, त्यापूर्वीच अनेकांनी आपापल्या वॉर्डात आपल्याच तिकीट मिळेल अस गृहीत धरून प्रचार सुरू केला आहे. त्यासाठी वेगवेगळ्या कार्यक्रमांचे आयोजन केले जात आहे. आतापासूनच मतांची जुळवाजुळव सुरू आहे. त्यामुळे दिवाळीनंतर होणारी महापालिकेची निवडणूक रंगतदार होणार, याच शंकाच नाही. (Nashik Municipal Election: Raw ward formation will be finalized in 3 days)
इतर बातम्याः
ST Strike Photo: संपाची धार तीव्र; उत्तर महाराष्ट्राची कोंडी!
निकाळजे म्हणतात, आमदारांवर गुन्हा दाखल करा; भुजबळ-कांदे वादाला नवे वळण
Special Report: स्वातंत्र्याचं बेफाम वारं, अनंतराव नावाचा झंझावात अन् महाराष्ट्रातलं ‘मॅन्चेस्टर गार्डियन’https://t.co/mThHQYOyX6#Marathwada|#HyderabadMuktisangram|#FreedomFighterAnantraoBhalerao|#Aurangabad|#Maharashtra|#Razakar
— TV9 Marathi (@TV9Marathi) November 8, 2021
