Special Report : वडिलांनी काँग्रेसची उमेदवारी नाकारली, मुलानं अपक्ष अर्ज दाखल केला, सत्यजित तांबे भाजपाचे उमेदवार?
एक काँग्रेसकडून आणि एक अपक्ष असे दोन अर्ज सत्यजित तांबे यांनी दाखल केले. पण, काँग्रेसचा एबी फार्म नसल्यानं सत्यजित तांबे अपक्ष म्हणून मैदानात आहेत.
नाशिक : महिनाभरापूर्वी देवेंद्र फडणवीस यांनी सत्यजित तांबे (Satyajit Tambe) यांच्यावरून सूचक वक्तव्य केलं होतं. त्याचाच परिणाम नाशिकच्या पदवीधर मतदारसंघात पाहायला मिळतो. काँग्रेसनं सुधीर तांबे यांना उमेदवारी अर्ज दाखल केलेला नाही. त्याचे पुत्र सत्यजित तांबे यांनी मात्र अपक्ष अर्ज भरला. त्यामुळं सत्यजित तांबे भाजपाचे उमेदवार असल्याची चर्चा आहे. नाशिक पदवीधर मतदारसंघाच्या निवडणुकीवरून काँग्रेसमध्येचं खळबळ उडाली आहे. काँग्रेसनं उमेदवारी सुधीर तांबे (Sudhir Tambe) यांना दिली होती.
सुधीर तांबे उमेदवारी अर्ज दाखल करण्यासाठी आले. पण, उमेदवारी अर्ज भरण्याची वेळ संपल्यानंतर सुधीर तांबे यांनी काँग्रेसमध्येच बाँब टाकला. स्वतः फार्म न भरता सुधीर तांबे यांनी पुत्र सत्यजित तांबे यांचा अर्ज दाखल केला. विशेष म्हणजे सत्यजित तांबे यांनी दोन अर्ज दाखल केले.
सत्यजित तांबे अपक्ष उमेदवार
एक काँग्रेसकडून आणि एक अपक्ष असे दोन अर्ज सत्यजित तांबे यांनी दाखल केले. पण, काँग्रेसचा एबी फार्म नसल्यानं सत्यजित तांबे अपक्ष म्हणून मैदानात आहेत. असं असलं तरी सत्यजित तांबे भाजपाचेच उमेदवार असल्याची चर्चा नाशिकमध्ये सुरू झाली आहे.
सत्यजित तांबे यांनी देवेंद्र फडणवीस यांच्याकडं पाठिंबा मागितला. उपमुख्यमंत्री देवेंद्र फडणवीस आणि भाजपाचे प्रदेश अध्यक्ष चंद्रशेखर बावनकुळे यांना पाठिंबा द्यावा, यासाठी विनंती करणार असल्याचं सत्यजित तांबे फार्म भरल्यानंतर म्हणाले.
बावनकुळे म्हणतात, पाठिंबा मागितल्यास विचार करू
विधान परिषदेच्या निवडणुकीत एकमेकांना मदत केली जाते. ही महाराष्ट्राची परंपरा आहे. यावर बोलताना चंद्रशेखर बावनकुळे म्हणाले, सत्यजित तांबे यांनी पाठिंबा मागितला तर आम्ही विचार करू. भाजपानं कुणालाही एबी फार्म दिला नाही. त्यामुळं आता भाजपाची भूमिका ठरवावी लागेल, असं चंद्रशेखर बावनकुळे यांनी सांगितलं.
भाजपमध्ये सत्यजित तांबे यावेत, यासाठी रस्सीखेच करण्यात आली. पण, सत्यजित तांबे हे भाजपामध्ये येऊ शकले नाही. भाजपानंही नाशिकमध्ये आपला अधिकृत उमेदवार घोषित केला नाही. भाजपाच्या धनराज विसपुते यांनी अपक्ष अर्ज दाखल केलाय. शुभांगी पाटील यांनीही अर्ज भरला. पण, या दोघांनाही भाजपानं एबी फार्म दिलाच नाही.
