तांदूळ घोटाळ्याच्या चौकशीत नाशिकमध्ये टोलवाटोलवी; महापालिकेने मारली झेडपीच्या गळ्यात जबाबदारी

नाशिकमधील या 13 कंत्राटदारांवर अपात्रतेची कारवाई करण्यात आली होती. मात्र, ही कारवाई मागे घेण्यासाठी काँग्रेस आमदार हिरामण खोसकर यांनी जोर लावला होता. सातत्याने लेखी पाठपुरावा केला होता. त्यांच्या पाठपुराव्यामुळेच शिक्षणंत्री वर्षा गायकवाड यांनी बैठक घेतली आणि...

नाशिकमध्ये गोदामात दडवून ठेवलेला तांदळाचा साठा.

मनोज कुलकर्णी | Updated on: Mar 01, 2022 | 12:58 PM

नाशिकः नाशिकमध्ये (Nashik) शालेय पोषण आहारातील तब्बल 15 हजार किलो तांदळावर एका कंत्राटदाराने डल्ला मारल्याचे नुकतेच समोर आले. मात्र, आता या प्रकरणाची चौकशी करण्यासाठी टोलवाटोलवी सुरू आहे. आम्ही फक्त तांदळाची मागणी करणार, अशी अजब भूमिका घेत महापालिकेने (municipal corporation) ही चौकशी जिल्हा परिषदेच्या गळ्यात मारली आहे. जिल्हा परिषदेचचा शिक्षण (Education) आणि विशेषतः शिक्षणाधिकारी हे या चौकशी समितीचे सर्वेसर्वा असल्याचे सांगत हात झटकण्यात आले आहेत. पालिकेच्या या संशयास्पद भूमिकेमुळे जिल्हा परिषद तरी हे प्रकरण शेवटपर्यंत लावून धरणार का, असा प्रश्न निर्माण झाला आहे.

नेमके प्रकरण काय?

नाशिकमध्ये तांदूळ घोटाळ्याच्या अनेक सुरस कथा आहेत. अडीच वर्षांपूर्वी शासनाच्या आदेशाचा आधार घेत बचत गटांना बाजूला सारून 13 कंत्राटदारांना सेंट्रल किचन अंतर्गत मुलांना पोषण आहार देण्याचे काम दिले गेले होते. तेच काम पंचवटीतील गुंजाळबाबा नगर येथे निफाड येथील स्वामी विवेकानंद संस्थेच्या कंत्राटदाराकडे देण्यात आले. कंत्राटदार हृषीकेश चौधरी याने याचाच लाभ घेत तब्बल 281 पोते तांदूळ म्हणजे 15 हजार किलोच्या धान्यावर डल्ला मारला होता. याची माहिती महिला बचत गटाला समजली. त्यांनी तपासणीसाठी आलेल्या प्राथमिक शिक्षण संचालयाच्या पथकाला माहिती देऊनही त्यावर कारवाई झाली नाही. मात्र, त्यानंतर महापालिकेच्या शिक्षणाधिकारी सुनीता धनगर यांनी या ठिकाणी धडक दिली. पंचनामा केला. मात्र, आता या प्रकरणावर कारवाई आणि चौकशी करायला महापालिका टाळाटाळ करत आहे.

बड्या नेत्यांचे हात

खरे तर नाशिकमधील या 13 कंत्राटदारांवर अपात्रतेची कारवाई करण्यात आली होती. मात्र, ही कारवाई मागे घेण्यासाठी काँग्रेस आमदार हिरामण खोसकर यांनी जोर लावला होता. सातत्याने लेखी पाठपुरावा केला होता. त्यांच्या पाठपुराव्यामुळेच शिक्षणंत्री वर्षा गायकवाड यांनी बैठक घेतली. विशेष म्हणजे या कंत्राटदाराचे 2 कोटी 70 लाखांचे बिल काढण्यासाठी शिक्षणमंत्री वर्षा गायकवाड यांच्या आदेशानुसार प्राथमिक शिक्षण संचालयाचे पथक तपासणीसाठी आले होते. त्यांच्यापुढेच कंत्राटदार पोषण आहाराच्या तांदळावर कसा डल्ला मारतोय, ही पोती गोदामात कशी पडून आहेत, हे महिला बचत गटाने दाखवून दिले. मात्र, या पथकाने त्याकडे दुर्लक्ष केले होते. या प्रकरणातील कंत्राटदारावर बड्या नेत्यांचा वरदहस्त आहे. हे पाहता चौकशीची टोलवाटोलवी सुरू असल्याचे समजते.

इतर बातम्याः