योग्यवेळी सीडी लावणार; ईडीच्या चौकशीवरून एकनाथ खडसेंचा पुन्हा इशारा

राष्ट्रवादीचे नेते एकनाथ खडसे यांनी माझी ईडी लावली तर सीडी बाहेर काढीन असं विधान केलं होतं. त्यानंतर खडसेंची ईडीकडून चौकशी करण्यात आली तरी त्यांनी सीडी बाहेर काढली नव्हती. (Will play CD soon, Eknath Khadse warns BJP against use of central agency)

एकनाथ खडसे

टीव्ही 9 मराठी डिजीटल टीम | Updated on: Aug 30, 2021 | 7:10 PM

जळगाव: राष्ट्रवादीचे नेते एकनाथ खडसे यांनी माझी ईडी लावली तर सीडी बाहेर काढीन असं विधान केलं होतं. त्यानंतर खडसेंची ईडीकडून चौकशी करण्यात आली तरी त्यांनी सीडी बाहेर काढली नव्हती. त्यावरून खडसेंना डिवचण्यातही आले होते. मात्र, आता खडसेंनी पहिल्यांदाच सीडीबाबत भाष्य केलं आहे. योग्यवेळी मी सीडी लावणार आहे, असा इशाराच एकनाथ खडसे यांनी दिला आहे. (Will play CD soon, Eknath Khadse warns BJP against use of central agency)

एकनाथ खडसे यांनी मीडियाशी बोलताना हा इशारा दिला. ईडी लावली तर सीडी लावेन असं मी म्हणालो होतो. हे खरं आहे. गेल्या पाच सहा महिन्यांपासून ती सीडी पोलिसांकडे दिली आहे. पोलीस त्याची चौकशी करत आहेत. चौकशी अहवाल आल्यानंतर लवकरच मी हा अहवाल जाहीर करणार आहे, असं खडसे म्हणाले.

हेतुपुरस्सर आरोप

गेल्या 40 वर्षात माझ्यावर एकही आक्षेप आलेला नाही. राजकारणात कधीही कुणी माझ्याविरोधात काही बोललेलं नाही. पण जमिनीबाबत माझ्यावर हेतूपुरस्सर आरोप करण्यात आला. कोर्टानेही आरोपात तथ्य नसल्याचं सांगितलं आहे. त्यामुळे कर नाही तर डर कशाला? त्यामुळे ईडीच्या चौकशीला सामोरे जात आहे, असं त्यांनी सांगितलं.

चंद्रकांतदादांचा आभारी आहे

जे भ्रष्टाचार करतात, गैरव्यवहार करतात त्या लोकांवर आम्ही कारवाई करतो, असं भाजपचे प्रदेशाध्यक्ष चंद्रकांत पाटील म्हणाले होते. त्यामुळे मला अपेक्षा आहे की दादांनी त्यांच्या शेजारी बसणाऱ्या लोकांची चौकशी करावी. त्यांनी माझी ईडीची चौकशी लावली हे चंद्रकांतदादांनी मान्य केलं. त्याबद्दल मी त्यांचा आभारी आहे, असा टोलाही त्यांनी लगावला. विधानसभेत मी वारंवार विचारलं माझा दोष काय आहे ते सांगा. आता ईडीने चौकशी लावली. ती कोर्टात काय व्हायचं ते होईल, असंही त्यांनी म्हटलं.

काय म्हणाले होते खडसे?

खडसे यांनी 23 ऑक्टोबर 2020मध्ये राष्ट्रवादीत प्रवेश केला होता. यावेळी त्यांनी भाषण करताना त्यांनी ईडी लावली तर मी सीडी लावेन, असा इशारा दिला होता. मला एकदा जयंत पाटील यांनी विचारलं की तुम्ही राष्ट्रवादीत येणार का? तर मी त्यांना सांगितलं की तुम्ही घेतलं तर येईन. तर त्यावेळी जयंत पाटील म्हणाले, तुम्ही आलात तर ते तुमच्यामागे ईडी लावतील, असे आमचे गमतीत बोलणं सुरु होतं. पण आता सांगतो जर त्यांनी ईडी लावली, तर मी सीडी लावीन, अशी इशारा एकनाथ खडसे यांनी दिला होता.

कुणाच्या पाठीत खंजीर खुपसला नाही

उत्तर महाराष्ट्रात भाजपला 6 खासदारकीच्या जागा यायच्या. येथे मी सातत्याने 5 जागा जिंकून आणल्या. जळगावातून नेहमी 2 खासदार निवडून दिले. मी संघर्ष केला, समोरासमोर लढलो, पण मी कुणाच्या पाठीत खंजीर खुपसला नाही. मी 40 वर्ष राजकारण केलं, पण बाईला समोर करुन मी राजकारण केलं नाही. तो माझा स्वभाव नाही. मी काही लेचापेचा नाही, असेही खडसे म्हणाले होते. मला राष्ट्रवादी काँग्रेसने काहीही दिलेलं नाही. मी केवळ पक्षाचं काम करेल. जितकं काम भाजपचं केलं, त्याच्या दुप्पट वेगाने राष्ट्रवादी काँग्रेस वाढवू. हे करुन दाखवू. माझ्या पाठीशी ठाम उभे राहा, मी कुणालाही घाबरणार नाही, असेही त्यांनी सांगितलं होतं. (Will play CD soon, Eknath Khadse warns BJP against use of central agency)